«QazMunaıGaz» ónimderi bas dırektory ustaldy

ASTANA. QazAqparat - «QazMunaıGaz» ónimderi bas dırektory ustaldy. Bul týraly búgin Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Janna Bastarova aıtty, dep habarlaıdy QazAqparat tilshisi.

Onyń sózine qaraǵanda, 2018 jyldyń 1 qarashasynda Sybaılas jemqorlyqqa qarsy is-qımyl ulttyq bıýrosymen jedel izdestirý sharalaryn júrgizý barysynda «QazMunaıGaz» UK» AQ «QazMunaıGaz» ónimderi JShS bas dırektorynyń zańsyz is-áreketteri anyqtalǵan.

«Ol ózine baǵynyshty «QazMunaıGaz ónimderi» JShS-nyń ShQO fılıaly dırektorynyń mindetin atqarýshydan jalpy qamqorlyǵymen onyń qyzmettik áreketterine jol berý úshin 4,3 mln teńge somasynda para aldy dep kúdiktelýde. Óz kinásin moıyndaýyna baılanysty kúdiktilerge qatysty kepil túrindegi bultartpaý sharasy qoldanyldy», - dedi Janna Bastarova.

Onyń dereginshe, qazirgi ýaqytta kúdiktilerdiń ústinen tergeý amaldary júrgizilip jatyr.

«Meniń bilýimshe, kepildik somasy shamamen 5 mln teńgeni quraıdy», - dedi ol.