«QazMunaıGaz» elimizdiń ońtústigindegi benzın jaǵdaıyna qatysty túsinik berdi
2021 jylǵy 10 jeltoqsan 16:01

«QazMunaıGaz» elimizdiń ońtústigindegi benzın jaǵdaıyna qatysty túsinik berdi

NUR-SULTAN. QazAqparat - «QazMunaıGaz» UK» AQ elimizdiń ońtústigindegi benzın jaǵdaıyna qatysty túsinik berdi, dep habarlaıdy QazAqparat.

9 jeltoqsan kúni Shymkent qalasynyń jáne Túrkistan oblysynyń janar-jaǵar maı quıý beketterinde benzın tapshylyǵy týyndaǵany týraly habarlanǵan bolatyn.

Túrkistan oblysy ákiminiń orynbasary Rashıd Aıýpov óńirdegi janarmaı tapshylyǵy Pavlodar zaýytynyń ýaqytsha jóndeý jumystaryna toqtaýyna tikeleı baılanysty ekenin jetkizdi.

Al «QazMunaıGaz» kompanııasy Qazaqstandaǵy 3 munaı óńdeý zaýyty qazir jumys istep turǵanyn aıtýda.

««QazMunaıGaz» UK AQ qazirgi ýaqytta barlyq úsh qazaqstandyq munaı óńdeý zaýyty qalypty jaǵdaıda jumys istep turǵanyn málimdeıdi.

Munaı óńdeý jáne munaı ónimderin shyǵarý QR Energetıka mınıstrligi bekitken jospardan artyq oryndalýda. Shymkent munaı óńdeý zaýyty táýligine shamamen 6 myń tonna benzın óndirip shyǵarady. Zaýyttan benzın munaı berýshilerdiń ótinimderine sáıkes ýaqtyly jiberilýde jáne táýligine 6 myńǵa jýyq tonnany quraıdy. Bul kólemniń shamamen 2 myń tonnasy Túrkistan oblysyna jóneltiledi.

Osylaısha, Shymkent óńdeý zaýyty tarapynan óńirde benzın tapshylyǵyn týdyratyndaı esh negiz joq», - delingen kompanııa málimetinde.

QMG dıspetcherlik-saraptaý ortalyǵynyń derekterine sáıkes osy jyldyń 10 jeltoqsanyndaǵy jaǵdaı boıynsha Túrkistan oblysynyń munaı bazalarynda AI-92 markaly benzınniń qory 15,4 myń tonnany quraıdy. Bul oblystyń 12 kúndik suranysyna teń.

«Budan bólek, resmı tulǵalardyń benzın tapshylyǵy Pavlodar munaı-hımııa zaýytyndaǵy jóndeýmen baılanysty týraly aqparat shyndyqqa janaspaıdy. Sebebi PMHZ-da jóndeý jumystary osy jyldyń qazan aıynda aıaqtalǵan», - dep tolyqtyrdy «QazMunaıGaz» UK AQ-dan.


Jańalyqtar

MURAǴAT