Qazgeoaqparat jáne Qazgeologııa mekemeleri biriktiriledi
2022 jylǵy 19 mamyr 12:35

Qazgeoaqparat jáne Qazgeologııa mekemeleri biriktiriledi

NUR-SULTAN. QazAqparat – «Qazgeoaqparat» jáne «Qazgeologııa» mekemelerin biriktirý arqyly Ulttyq geologııalyq qyzmet qurylady. Bul jaıynda «Qazgeoaqparat» respýblıkalyq geologııalyq aqparat ortalyǵy» JShS bas dırektory Janat Káribaev aıtty, dep habarlaıdy QazAqparat tilshisi.

«Búginde jarǵylyq kapıtalyna 100 paıyz memleket ıelik etken «Qazgeoaqparat» respýblıkalyq geologııalyq aqparat ortalyǵy» JShS-ni «QR Ulttyq geologııalyq qyzmeti» aktsıonerlik qoǵamy etip qaıta qurýdy uıymdastyrý jumystary júrip jatyr. Kelesi kezeńde oǵan «Qazgeologııa» ulttyq geologııalyq barlaý kompanııasy» AQ-ny qosý josparlanǵan», - dedi ol ortalyq kommýnıkatsııalar qyzmetinde ótken brıfıngte.

Onyń sózinshe, «Qazgeoaqparat» RGAO» JShS men «Qazgeologııa» AQ-ny biriktirý sheshimi Ulybrıtanııa, Kanada, Fınlıandııa sııaqty elderdiń geologııadaǵy tájirıbesin eskere otyryp qabyldanǵan.

Sondaı-aq, Janat Káribaev Ulttyq geologııa qyzmetiniń negizgi jumys baǵyttaryn atady. Olar:

- jer qoınaýyn utymdy paıdalaný jáne mıneraldyq-shıkizat bazasyn molaıtý salasyndaǵy memlekettik saıasatty iske asyrý;

- jer qoınaýyna geologııalyq zertteý júrgizýdi ǵylymı negizdeý maqsatynda eldiń beıindik joǵary oqý oryndarymen ózara is-qımyl jasaý;

- paıdaly qazbalardyń qıyn alynatyn qorlaryn ıgerý úshin ozyq tehnologııalardy qoldaný, tsıfrlandyrý, geoaqparattyq júıeler jáne iri tabysty kompanııalarmen tájirıbe almasý;

- geologııa salasyndaǵy baǵdarlamalar men strategııalardy qalyptastyrý;

- servıstik qyzmetter;

- bastapqy geologııalyq aqparattyń saqtalýyn qamtamasyz etetin Kern qoımasyn qalyptastyrý;

- halyqaralyq akkredıtatsııasy bar zerthanalar ashý;

- geologııalyq aqparatty jınaý, saqtaý, óńdeý, júıeleý jáne usyný úshin qorda saqtaý;

- ınvestıtsııalyq jobalardy ázirlep, ómirge engizý;

- memlekettik monıtorıng;

- «Kaznedra» biryńǵaı platformasynda barlyq bıznes-protsesterdi avtomattandyrý.

Aıta keteıik, QR Prezıdenti Qasym-Jomart Toqaev 2021 jyly Qazaqstan halqyna Joldaýynda osyndaı tapsyrma bergen bolatyn.


Jańalyqtar

MURAǴAT