Qazaqstannyń Ulybrıtanııadaǵy Elshisi taǵaıyndaldy

2022 jylǵy 6 qazan, 16:30
Qazaqstannyń Ulybrıtanııadaǵy Elshisi taǵaıyndaldy

ASTANA. QazAqparat – Memleket basshysynyń Jarlyǵymen Maǵjan Janbotauly Іlııasov Qazaqstan Respýblıkasynyń Ulybrıtanııa jáne Soltústik Irlandııa Qurama Koroldigindegi Tótenshe jáne Ókiletti Elshisi bolyp taǵaıyndaldy, ol Qazaqstan Respýblıkasynyń Birikken Ulttar Uıymy janyndaǵy Turaqty ókili laýazymynan bosatyldy. Bul týraly QazAqparat Aqordaǵa silteme jasap habarlaıdy.

Maǵjan Іlııasov 1974 jyly Almaty qalasynda dúnıege keldi.

1996 jyly Qazaq Memlekettik Álem tilderi ýnıversıtetiniń Halyqaralyq qatynastar fakýltetin úzdik bitirgen. 1994-1995 jyldary AQSh-tyń Montana Shtatyndaǵy Ýnıversıtette bilim almasý baǵdarlamasy boıynsha oqydy.

QazMÁTÝ-di bitirgennen keıin, 1996 jyldan 1999 jylǵa deıin Qazaqstan Respýblıkasy Syrtqy ister mınıstrliginiń ortalyq apparatynda (referent, Halyqaralyq uıymdar jáne halyqaralyq ekonomıkalyq qatynastar bas basqarmasynda attashe, BUU jáne halyqaralyq ekonomıkalyq qatynastar basqarmasynda úshinshi, ekinshi hatshy) qyzmet etti.

1998 jylǵy mamyr men tamyz aralyǵynda – «Klıngendal» halyqaralyq qatynastar ınstıtýty dıplomatııalyq kýrstarynyń tyńdaýshysy, Gaaga, Nıderlandy. 1999 jyldan beri – Qazaqstan Respýblıkasy Prezıdentiniń Ákimshiliginde qyzmet istedi (Prezıdent Protokolynda konýsýltant, Prezıdent Keńsesinde bas sarapshy, Syrtqy saıasat ortalyǵynda bas ınspektor).

2007 jyldyń aqpanynda Qazaqstan Respýblıkasy Prezıdentiniń Ákimshiligi Syrtqy saıasat ortalyǵynyń meńgerýshisi bolyp taǵaıyndaldy.

2013 jylǵy mamyrda QR Prezıdentiniń «Bolashaq» halyqaralyq stıpendııasy aıasynda Garvard Ýnıversıtetinde «Memlekettik basqarý» mamandyǵy boıynsha magıstratýrany bitirdi.

2013 jylǵy maýsym men jeltoqsan aralyǵynda – Qazaqstan Respýblıkasy Prezıdentiniń keńesshisi.

2013-2016 jyldary – Qazaqstan Respýblıkasy Prezıdentiniń keńesshisi – Qazaqstan Respýblıkasy Prezıdenti Ákimshiliginiń Syrtqy saıasat ortalyǵynyń meńgerýshisi.

2016-2020 jyldary – Qazaqstan Respýblıkasynyń Nıderland Koroldigindegi Tótenshe jáne Ókiletti elshisi, Hımııalyq qarýǵa tyıym salý uıymyndaǵy Qazaqstan Respýblıkasynnyń turaqty ókili.

2020 jyldyń qyrkúıek aıynan bastap osy taǵaıyndaýǵa deıin Birikken Ulttar Uıymy janyndaǵy Qazaqstan Respýblıkasynyń turaqty ókili boldy.

«Qazaqstan Respýblıkasynyń Táýelsizdigine 10 jyl» mereıtoılyq medalimen jáne «Eren eńbegi úshin» medalimen marapattalǵan.

Foto: gov.kz
Tegı:
Uqsas jańalyqtar
Seriktester jańalyqtary

Jańalyqtar