Qazaqstannyń soltústik jáne shyǵys óńirleri Reseı gazymen qamtylýy múmkin - Premer

NUR-SULTAN. QazAqparat – Reseı tarapy Qazaqstannyń soltústik jáne shyǵys óńirlerin gazdandyrý nusqasyn qaraýǵa daıyn. Bul jaıynda Senat depýtattarynyń saýalyna Premer-Mınıstr Álıhan Smaıylovtyń jaýabynda aıtyldy, dep habarlaıdy QazAqparat tilshisi.

Úkimet basshysynyń atap ótýinshe, elimizdiń soltústik jáne shyǵys óńirlerin gazdandyrý boıynsha naqty sheshim qabyldaý maqsatynda eki nusqa qarastyrylyp jatyr. Onyń biri - Reseıden gaz tartý.

«Osy jyldyń 11 aqpanynda ótken qazaqstandyq-reseılik jumys tobynyń otyrysy barysynda reseılik tarap gazdy kommertsııalyq baǵamen satyp alǵan jaǵdaıda elimizdiń soltústik jáne shyǵys óńirlerin gazdandyrý nusqasyn qarastyrǵa daıyn ekendikterin atap ótti. Búginde gaz baǵasyn anyqtaýǵa baılanysty esepteýler júrgizilip jatyr. Osy jyldyń 12 sáýirinde «Gazprom» JAQ-pen keńes barysynda qazaqstandyq tarap gazdandyrýdyń balama nusqalaryn qarastyrý maqsatynda Reseı Federatsııasynan suıytylǵan tabıǵı gaz jetkizý jolymen gazdandyrý nusqasyn zerdeleýdi usyndy. Buǵan qosa, atalǵan nusqa gazben qaıta jabdyqtaý jáne syǵý ınfraqurylymyna qarjy salýdy talap etedi. Qorytyndysynda taraptar – QazaqGaz UK AQ men «Gazprom» JAQ arasyndaǵy jumys toby bul máseleni odan ary pysyqtaý ýaǵdalastyǵyna qol jetkizdi», - dep atap ótti Álıhan Smaıylov.

Onyń dereginshe, elimizdiń atalǵan óńirlerin «Saryarqa» magıstraldi gaz qubyry arqyly da gazdandyrý joly bar.

«AstanaGaz QMG» AQ «Saryarqa» magıstraldy gaz qubyry qurylysy» ІІ-ІІІ kezeńderiniń tehnıkalyq-ekonomıkalyq negizdemesin túzetý jumystaryn aıaqtady. Nur-Sultan-Kókshetaý-Petropavl ýchaskesi boıynsha «Memsaraptama» RKM eskertpelerin joıý jumystary júrgizilýde. Osy jyldyń maýsym aıynyń sońyna deıin vedomstvodan tys keshendi saraptama qorytyndysyn alý josparlanyp otyr. Joǵaryda aıtylǵandardy eskere otyryp, barlyq bastapqy málimetter (gaz baǵasy, qurylys quny, halyqty qamtý jáne t.b.) alynǵannan keıin elimizdiń soltústik jáne shyǵys óńirlerin gazdandyrýdyń sońǵy ońtaıly nusqasy tańdalady», - dedi Premer-Mınıstr jaýabynda.