Qazaqstannyń saıası jańǵyrýǵa betburysyn halyqaralyq qaýymdastyqqa tanytýǵa mán beriledi
2022 jylǵy 1 shilde 13:49

Qazaqstannyń saıası jańǵyrýǵa betburysyn halyqaralyq qaýymdastyqqa tanytýǵa mán beriledi

NUR-SULTAN. QazAqparat – Halyqaralyq qaýymdastyqqa Qazaqstannyń aýqymdy reformalar júrgizip, saıası jańǵyrý jolyna bet burǵan el retinde tanytýǵa aıryqsha mán beriledi. Bul týraly «Halyqaralyq qatynastardyń qazirgi zamanǵy júıesindegi Qazaqstan Respýblıkasy» atty halyqaralyq konferentsııa barysynda QR Syrtqy ister mınıstri Muhtar Tileýberdi aıtty, dep habarlaıdy QazAqparat tilshisi.

«Ózderińizge málim, otandyq dıplomatııanyń 30 jyldyǵy Memleket basshysy jarııalaǵan Jańa Qazaqstan qurý jónindegi el tarıhyndaǵy jańa kezeńmen tuspa-tus kelip otyr. Syrtqy ister mınıstrligi Qazaqstannyń halyqaralyq arenadaǵy bedelin odan ári nyǵaıtý, onyń syrtqy qaýipsizdigin qamtamasyz etý, sheteldegi azamattarymyzdyń quqyqtary men múddelerin meılinshe qorǵaý jolyndaǵy qyzmetin odan ári jalǵastyra bermek», - dedi mınıstr.

Onyń atap ótýinshe, elimizdi óńirdegi bedeli men belsendiligin saqtaı, kópvektorly syrtqy saıasat qaǵıdatynyń negizinde sheteldik seriktestermen saıası, ınvestıtsııalyq jáne saýda baılanystaryn odan ári damytý máselesi de mınıstrliktiń asa mańyzdy mindetteriniń biri bolmaq.

«Halyqaralyq qaýymdastyqqa Qazaqstannyń aýqymdy reformalar júrgizip, saıası jańǵyrý jolyna bet burǵan el retinde tanytýǵa aıryqsha mán beriletin bolady. Dıplomattarymyzdyń osy mindetterdi múltiksiz oryndap, Jańa Qazaqstannyń syrtqy saıasatynyń aldyna qoıylǵan jańa maqsattarǵa qol jetkizetinine, elimizdiń álemdik sahnadaǵy bedeli men yqpalyn odan ári nyǵaıta beretinine kámil senemin», - dedi Muhtar Tileýberdi.

Mınıstr sózin qorytyndylaı kele, búgin álem koronavırýstyq pandemııadan keıin geosaıası shıelenistiń ósýine baılanysty ekonomıkalyq qıyndyqtarǵa jalǵasyp otyrǵan joǵary týrbýlenttik dáýirge engenin atap ótti.

«Saýda qatynastarynyń ózgerýi nátıjesinde logıstıkalyq jáne energetıkalyq baǵyttardyń transformatsııasy, sondaı-aq álemdegi buryn-sońdy bolmaǵan sanktsııalyq teketires jańa táýekelder men qaýip-qaterlerdi týyndatýda. Osy jaǵdaıda otandyq dıplomatııanyń kúsh-jigeri Jańa Qazaqstandy qurýǵa arnalǵan Prezıdent Qasym-Jomart Kemeluly Toqaevtyń aýqymdy saıası jáne ekonomıkalyq reformalaryn qoldaýǵa baǵyttalatyn bolady», - dedi ol.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT