Qazaqstannyń ońtústik aımaǵynda jaryq joq: «KEGOC» sebebin túsindirdi
2022 jylǵy 25 qańtar 13:24

Qazaqstannyń ońtústik aımaǵynda jaryq joq: «KEGOC» sebebin túsindirdi

NUR-SULTAN. QazAqparat - «KEGOC» kompanııasy Qazaqstannyń ońtústik aımaǵynda jaryqtyń óshý sebebin aıtty, dep habarlaıdy QazAqparat tilshisi.

«2022 jyldyń 25 qańtarynda saǵat 11.59-da (Nur-Sultan ýaqytymen) Ortalyq Azııa (Ózbekstan, Qyrǵyzstan) energııa júıesinde týyndaǵan aıtarlyqtaı apattyq teńgerimsizdiktiń saldarynan «Soltústik-Shyǵys-Qazaqstannyń ońtústigi» 500 kV elektr energııasy tranzıtine arnalǵan qýattyń tómendeýi oryn aldy.

Sonyń saldarynan «Soltústik-Shyǵys-Qazaqstannyń ońtústigi» tranzıtiniń apatty bólinýi oryn alyp, Qazaqstannyń ońtústik aımaǵyndaǵy tutynýshylardyń basym bóligi úshin jaryq óshti. Shektelý kólemi shamamen 1 500 megavatty quraıdy. Qazirgi ýaqytta júıe operatory «KEGOC» AQ apatty joıý is-sharalaryn qabyldap jatyr», - delingen kompanııa aqparatynda.

Buǵan deıin «Samuryq-Energo» AQ Almatyda elektr energııasynyń óshýine baılanysty túsinik bergen edi.

«Óńirdi energojúıeniń soltústik jáne ońtústik bólikterimen baılanystyratyn joǵary voltty elektr jelileriniń apatty túrde toqtaýyna baılanysty Almaty qalasy men Almaty energetıka ortalyǵy oqshaýlandyrylǵan jumysqa aýystyryldy», - dedi kompanııadan.

Sondaı-aq búgin Qyzylorda oblysynda elektr energııasyna baılanysty aqaýlar boldy.

Budan bólek, áleýmettik jelilerde jaryq Jambyl jáne Túrkistan oblystarynda da óshkeni týraly jazylýda.


Jańalyqtar

MURAǴAT