Qazaqstannyń kórshiles elderdiń eshqaısysymen aýmaqtyq daýy joq – Muhtar Tileýberdi
2022 jylǵy 1 shilde 12:26

Qazaqstannyń kórshiles elderdiń eshqaısysymen aýmaqtyq daýy joq – Muhtar Tileýberdi

NUR-SULTAN. QazAqparat – Qazaqstannyń kórshiles elderdiń eshqaısysymen aýmaqtyq daýy joq. Bul týraly «Halyqaralyq qatynastardyń qazirgi zamanǵy júıesindegi Qazaqstan Respýblıkasy» atty halyqaralyq konferentsııa barysynda QR Syrtqy ister mınıstri Muhtar Tileýberdi aıtty, dep habarlaıdy QazAqparat tilshisi.

«2020 jyldyń naýryz aıynda qabyldanǵan 2020-2030 jyldarǵa arnalǵan syrtqy saıasat tujyrymdamasy qazaqstandyq dıplomatııany odan ári jetildirýdiń negizin qalady. Bul qujat halyqaralyq arenada ulttyq múddelerdi ilgeriletýdiń strategııalyq basymdyqtary men tetikterin aıqyndaıtyn negizgi qaǵıdattardy qalyptastyrady. Tujyrymdamada syrtqy saıası kýrs negizderiniń sabaqtastyǵy – kópvektorly, tepe-teńdik, pragmatızm jáne ulttyq múddelerdi qorǵaý saqtalady», - dedi mınıstr.

Muhtar Tileýberdi Qazaqstan postkeńestik keńistikte alǵashqylardyń biri bolyp memlekettik shekarany onyń búkil uzyndyǵy boıymen resimdegenin jáne búginde kórshiles elderdiń eshqaısysymen aýmaqtyq daýy joq ekenin atap ótti.

Sonymen qatar mınıstr elimizdiń 2017-2018 jyldary BUU Qaýipsizdik keńesiniń turaqty emes múshesi bolyp saılanýy tarıhı oqıǵa bolǵandyǵyn atap ótti. Qazaqstannyń múshe bolýy Ortalyq Azııanyń ózekti máselelerin joǵary deńgeıde kórsetýdiń tamasha múmkindigine aınaldy. Óıtkeni elimiz saıası jáne ekonomıkalyq ózgeristerdiń tutas keshenin bastan keshirip jatqan aımaqtaǵy barlyq elderdiń ujymdyq múddelerin bildirýge umtyldy. Halyqaralyq arenadaǵy jaýapty da beıbitshil saıasatynyń arqasynda elimiz postkeńestik keńistikte birinshi bolyp 2010 jyly EQYU-ǵa basshylyq etý qurmetin ıelendi.

«Qazaqstannyń tóraǵalyǵynyń qorytyndysy –EQYU-nyń 21 ǵasyrdaǵy birinshi jáne ókinishke oraı, ázirge jalǵyz sammıtin elordamyzda ótkizý jáne «Qaýipsizdik qoǵamdastyǵyn qurý jolynda» atty tarıhı Astana deklaratsııasynyń qabyldanýy boldy. Eýropalyq qaýipsizdiktiń aǵymdaǵy daǵdarysy aıasynda Astana sammıtiniń murasy qazirde qaýipsizdiktiń qurlyqtyq platformasyn qalyptastyrýda ózektiligin saqtap otyr», - dedi Muhtar Tileýberdi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT