Qazaqstannyń 430 áskerı qyzmetshisi BUU bitimgershilik mıssııasyna jiberiledi
2022 jylǵy 30 maýsym 10:25

Qazaqstannyń 430 áskerı qyzmetshisi BUU bitimgershilik mıssııasyna jiberiledi

NUR-SULTAN. QazAqparat – Memleket basshysy Qasym-Jomart Toqaev Parlamentke QR Qarýly Kúshteriniń bitimgershilik kontıngentin BUU mıssııalaryna jiberý týraly usynys engizdi, dep habarlaıdy QazAqparat tilshisi.

Konstıtýtsııanyń 53-babynyń 5-tarmaqshasyna sáıkes, Prezıdent usynysy boıynsha Parlament palatalarynyń birlesken otyrysynda halyqaralyq mindettemelerdi oryndaý úshin respýblıkanyń Qarýly Kúshterin paıdalaný týraly sheshim qabyldaıdy. Osyǵan baılanysty, QR Qorǵanys mınıstri Rýslan Jaqsylyqov Memleket basshysynyń usynysyn oqyp berdi.

«Qazirgi ýaqytqa deıin Qarýly Kúshterdiń áskerı qyzmetshileri Parlament qaýlylaryna sáıkes, beıbitshilik pen qaýipsizdikti qoldaý jónindegi halyqaralyq mindettemelerdi oryndaý úshin BUU bitimgershgilik mıssııalaryna jiberilip otyrdy. 2014 jyldan bastap 45 ofıtser Batys Saharada, Kot-d’Ivýárda, Lıvandaǵy mıssııaǵa áskerı baıqaýshy jáne shtab-ofıtseri retinde, 2018 jyldan bastap – 520 áskerı qyzmetshi bitimgershilik bólimshe quramynda Lıvandaǵy ýaqytsha kúshter mıssııasyna qatysty. Qazir Batys Saharada – 6, Lıvandaǵy ýaqytsha kúshterde – 9 áskerı qyzmetshi júr», - dep jazylǵan Prezıdent usynymynda.

Onyń aıtýynsha, uıym basshylyǵy bizdiń áskerılerdiń daıarlyq deńgeıin joǵary baǵalap, bitimgerler sanyn arttyrýǵa qoldaý kórsetýge daıyn ekenin bildirdi. Kontıngentti bitimgershilik operatsııasyna jiberip, jahandyq qaýipsizdikti nyǵaıtýǵa úles qosý Qazaqstannyń halyqaralyq arenadaǵy bedeli men rólin arttyrýǵa yqpal etedi.

«Ómirde jáne álemde bolyp jatqan sońǵy oqıǵalar qaýipsizdikke tónetin syn-qaterdi joqqa shyǵarmaıdy. Osyǵan baılanysty áskerdiń jaýyngerlik ázirligin odan ári nyǵaıtý qazirgi syn-qaterge qarsy áreket etýde tájirıbe jınaqtaý máselesi ózekti bolyp otyr. Osy turǵyda uıym jarǵysynyń 7-taraýyna sáıkes, Qarýly Kúshterdiń Ortalyq Afrıkada, Kongo Demokratııalyq Respýblıkaynda, Malıde bitimgershilik mıssııaǵa qatysýyn keńeıtýdi oryndy dep sanaımyn», - deıdi Q. Toqaev.

Qazaqstan shtab ofıtseri, áskerı baıqaýshy retinde qazirgi ýaqytta mıssııada anaǵurlym tapshy bolyp otyrǵan jaıaý ásker, medıtsınalyq barlaý, ınjenerlik, áskerı polıtsııa bólimshesin bólýge daıyn.

«Konstıtýtsııanyń 53-babyna sáıkes, bitimgershilik kontıngent jalpy sany 430 áskerı qyzmetshini birinshi – Ortalyq Afrıkadaǵy turaqtandyrý jónindegi mıssııaǵa, ekinshi – Kongo Demokratııalyq Respýblıkasyndaǵy turaqtandyrý jónindegi mıssııaǵa, úshinshi Malıdegi turaqtandyrý jónindegi mıssııaǵa, tórtinshi – Lıvandaǵy ýaqytsha kúshter mıssııasyna jiberý týraly usynys engizemin», - dep jazylǵan Prezıdent usynysynda.

Birlesken palata otyrysynda depýtattar Prezıdent usynysyn qabyldady.


Uqsas jańalyqtar

Jańalyqtar

Úrdis

MURAǴAT