Qazaqstanǵa kelgen reseılikterdiń 65 paıyzy basqa memleketterge ketken

2022 jylǵy 28 qyrkúıek, 13:57
Qazaqstanǵa kelgen reseılikterdiń 65 paıyzy basqa memleketterge ketken

ASTANA. QazAqparat – Sońǵy aptada Qazaqstanǵa kelgen reseılikterdiń zań buzǵany týraly málimet tirkelmedi. Bul týraly Májiliste tilshiler saýalyna jaýap berý kezinde Іshki ister mınıstriniń birinshi orynbasary Marat Qojaev aıtty, dep habarlaıdy QazAqparat tilshisi.

Reseıden kelip jatqan adamdar týraly málimetter kún saıyn ózgerip jatqanyna toqtalǵan ol: «Shekara qyzmetinde naqty derekter bar. 100 myńǵa tarta adam kelse, búginde 65 paıyzǵa jýyǵy elden shyqty. Keshegi derek boıynsha 64 myńnan astamy elimizden tys aýmaqqa ketti», - dedi.

Sonymen qatar tilshiler jumyssyz shetel azamattarynyń áreketinen qylmystyń artýy qaýpine qatysty suraq qoıdy.

«Osy aptada elge kelgen adamdardyń qylmys jasaý deregi tirkelmedi. Negizinen zań talaptaryna baǵynatyn adamdar kelip jatyr jáne olardyń ózderinde qarajaty bar. Eger olar qylmys jasasa, onda tıisti sharalar qabyldanady. Zań bárine birdeı ekenin bilesizder. Kóshi-qon zańnamasynyń talaptaryn oryndamasa, onda el aýmaǵynan shyǵarylady. Al qylmystyq áreketteri úshin jaýapkershilikke tartylady», - dedi M. Qojaev.

Onyń aıtýynsha, elge kelip jatqan shetel azamattaryna qatysty tıisti tirkeý júrip jatyr.


Tegı:
Uqsas jańalyqtar
Seriktester jańalyqtary

Jańalyqtar