Jańalyqtar  >

Qazaqstanǵa AES reaktorynyń 13 jobasy usynyldy

2022 jylǵy 28 qarasha, 12:21
Qazaqstanǵa AES reaktorynyń 13 jobasy usynyldy

ASTANA. QazAqparat – «Qazaqstandyq atom elektr stantsııalary» JShS bas dırektory Tımýr Jántikın elimizge AES reaktoryn usynǵan 13 jobanyń nege tórteýi ǵana qaralyp jatqanyn túsindirdi, dep habarlaıdy QazAqparat tilshisi.

«Elimizde AES salýǵa nıetti KHNP (Ońtústik Koreıa), EDF (Frantsııa), Rosatom (Reseı), CNNC (Qytaı) kásiporyndarynyń jobalary qarastyrylyp jatyr. AES salý maqsatynda vendordy tańdaý jumysy áli de júrgizilýde. Jalpy, zamanaýı reaktorlardyń 13 jobasynyń tehnıkalyq usynystary qaraldy», - dep jazylǵan Tımýr Jántikınniń QazAqparat saýalyna joldaǵan jaýabynda.

Aıtýynsha, 13 jobanyń ishinde tórteýi ǵana ýaqyt synaǵynan ótken. Qalǵandarynyń kóbi jobalaý nemese lıtsenzııalaý kezeńin bastan ótkerip jatyr.

«Eldegi alǵashqy AES-ti salý jáne sátti paıdalaný úshin tájirıbesi bar, tehnologııasy synalǵan reaktordy tańdaǵan jón. NuScale Power (AQSh) jáne General Electric – Hitachi (AQSh-Japonııa) kompanııalarynyń shaǵyn modýldik reaktorlyq qondyrǵylarynyń búgingi kúni jumys istep turǵan prototıpteri joq. Alaıda, bolashaqta osy tehnologııalardy qarastyrý máselesine qaıta oralýǵa bolady. Osyǵan baılanysty alǵashqy AES salý úshin potentsıaldy merdigerler sany tórtke azaıdy», - delingen jaýapta.


Foto: storage.googleapis.com



Uqsas jańalyqtar
Tegı:
Energetıka   AES  
Seriktester jańalyqtary

Jańalyqtar