Qazaqstandyqtar zeınetaqy qoryna jyl basynan 523 mlrd teńge aýdardy
2022 jylǵy 27 mamyr 18:04

Qazaqstandyqtar zeınetaqy qoryna jyl basynan 523 mlrd teńge aýdardy

NUR-SULTAN. QazAqparat – Qazaqstandyqtar jyl basynan Biryńǵaı jınaqtaýshy zeınetaqy qoryna 523 mıllıard teńgeden astam qarjy aýdarǵan, dep habarlaıdy QazAqparat qor saıtyna silteme jasap.

«2022 jyldyń tórt aıynda salymshylardyń shottaryna shamamen 523,5 mlrd teńge kóleminde zeınetaqy jarnalary tústi. Bul 2021 jyldyń sáıkes kezeńindegi kórsetkishten 27% nemese 110,7 mlrd teńgege kóp. Ósim jarnalardyń barlyq túri boıynsha bolǵanyn atap ótý kerek», - delingen málimette.

Jalpy, bıylǵy 1 mamyrdaǵy jaǵdaı boıynsha, BJZQ salymshylarynyń shottarynda 13,0 trln teńgege jýyq zeınetaqy jınaǵy saqtaýly.

Salymshylardyń jarnalarynan bólek, zeınetaqy jınaqtary taza ınvestıtsııalyq tabystyń arqasynda artqan. 2022 jyldyń 1 qańtary men 1 mamyry aralyǵynda bul kórsetkish 128,7 mlrd teńge boldy.

2022 jyldyń 1 mamyryna qaraı, BJZQ-daǵy jeke zeınetaqy shottarynyń sany 11,7 mln jetti. Shottardyń eń kóp úlesi mindetti zeınetaqy jarnalary (MZJ) esebinen ashyldy – 10 870 075.

Sondaı-aq málim etilgendeı, jyl basynan beri BJZQ óz salymshylaryna 921,4 mlrd teńge tóledi, onyń basym bóligin turǵyn úı jaǵdaıyn jaqsartý jáne emdeý maqsattaryna arnalǵan birjolǵy zeınetaqy tólemderi (BZT) quraıdy – 831,7 mlrd teńge. Jasyna baılanysty tólemder – 37,0 mlrd teńge, muragerlik boıynsha tólemder – 23,4 mlrd teńge, QR sheginen tys TTJ ketýge baılanysty tólemder – 16,9 mlrd teńge, saqtandyrý uıymdaryna aýdarymdar shamamen 9,7 mlrd teńge, jerleýge arnalǵan tólemder – 1,9 mlrd teńge jáne múgedektik boıynsha tólemder – 0,8 mlrd teńge.


Jańalyqtar

MURAǴAT