Qazaqstandyq jas tennısshi alǵash ret Ýımbldonda negizgi jarysqa joldama aldy
2022 jylǵy 1 shilde 19:30

Qazaqstandyq jas tennısshi alǵash ret Ýımbldonda negizgi jarysqa joldama aldy

NUR-SULTAN. QazAqparat – Qazaqstandyq Sandýǵash Kenjebaeva Ýımbldon jasóspirimder týrnırinde negizgi jarysqa joldama aldy, dep habarlaıdy QazAqparat tilshisi.

Qazaqstan tennıs federatsııasynan málim etkendeı, Sandýǵash óz sporttyq jolynda alǵash ret «Úlken dýlyǵanyń» negizgi týrnırine ótti.

Team Kazakhstan akademııasynyń túlegi Ýımbldon irikteý saıystarynyń fınalynda 18 jasqa deıingiler arasynda álemniń 85-raketkasy, nıderlandylyq Isıs van den Breıkti tartysty matchta 6:1, 5:7, 10:8 esebimen utty.

«Men Ýımbldonda negizgi dodaǵa ótkenime óte qýanyshtymyn. Іrikteý saıystarynda ár oıynǵa eń sońǵy báseke sekildi sezinip, tyńǵylyqty daıyndaldym. Endi aldaǵy aptada bar ónerimdi salatyn bolamyn», dedi S.Kenjebaeva.

Taǵy bir jas qazaqstandyq Janel Rústemova irikteý saıystarynyń fınalynda slovenııalyq Ela Nala Mılıchke jol berdi – 3:6, 2:6.

Eske sala keteıik, budan buryn qazaqstandyq jas tennısshiniń Ýımbldon jarysyn jeńispen bastaǵanyn, Elena Rybakınanyń US Open chempıonyn utqanyn jazǵan bolatynbyz.


Foto: ktf.kz

Seriktester jańalyqtary

Jańalyqtar

Úrdis

MURAǴAT