Qazaqstandyq tennısshi Shymkent týrnıriniń ekinshi aınalymyna shyqty
2022 jylǵy 17 mamyr 14:54

Qazaqstandyq tennısshi Shymkent týrnıriniń ekinshi aınalymyna shyqty

NUR-SULTAN. QazAqparat – Qazaqstandyq Beıbit Jýkaev Shymkentte ótip jatqan BeeTV Challenger 80 týrnıriniń ekinshi aınalymyna shyqty, dep habarlaıdy QazAqparat tilshisi.

Dúnıejúzilik reıtıngte 491-orynda turǵan Beıbit Jýkaev bastapqy kezdesýin álemniń 418-raketkasy, úndistandyq Sashı Kýmar Mýkýndpen ótkizdi.

Aqtaý qalasynyń túlegi, 21 jastaǵy tennısshi birinshi partııada aıqyn basymdylyq tanytty – 6:1.

Ekinshi set tartysty órbip, taı-breıkte Beıbit jeńisti julyp aldy – 7:6 (13:11).

Bir saǵat 41 mınýtqa sozylǵan match barysynda B.Jýkaev 9 eıs jasap, 10 breık-poınttyń úsheýin paıdalandy. Qarsylasy 1 eıs, 1 breıkpen shekteldi.

B.Jýkaev shırek fınalǵa shyǵý úshin álemniń 463-raketkasy, amerıkalyq Evan Chjýmen talasady.

Taǵy bir qazaqstandyq Denıs Evseev ekinshi aınalymda japonııalyq Kaıchı Ýchıdamen sheberlik baıqasady.

Shymkent 2 chellendjer týrnıri 22 mamyrda márege jetedi.

Budan bir apta buryn Shymkenttegi dál osyndaı dodada B.Jýkaev alǵashqy aınalymnan asa almaǵan edi.

Eske sala keteıik, budan buryn Andreı Golýbevtiń álemdik reıtıngide rekordtyq nátıjege qol jetkizgenin, Tımofeı Skatovtyń Rolan Garros týrnıriniń irikteý saıysyn jeńispen bastaǵanyn jazǵan bolatynbyz.

Sondaı-aq qazaqstandyq tennısshi Frantsııadaǵy týrnırdiń shırek fınalyna shyqty.





Uqsas jańalyqtar

Jańalyqtar

Úrdis

MURAǴAT