Qazaqstandyq tennısshi Lıtvada ótken jarysta absolıýtti chempıon atandy
2022 jylǵy 22 qańtar 19:13

Qazaqstandyq tennısshi Lıtvada ótken jarysta absolıýtti chempıon atandy

NUR-SULTAN. QazAqparat – Qazaqstandyq Denıs Evseev Lıtva astanasy Vılnıýste ótken ITF týrnıriniń absolıýtti jeńimpazy atandy, dep habarlaıdy QazAqparat tilshisi.

Qazaqstan tennıs federatsııasy málim etkenindeı, júlde qory 25 myń AQSh dollaryna baǵalanǵan jarysta D.Evseev jekeleı jáne juptyq synda úzdik shyqty.

Aldymen Denıs belorýssııalyq Ivan Lıýtarevıchpen birge juptyq syn fınalynda majarstandyqtar Fabıan Marojan men Peter Faıtty tartysty matchta 6:4, 7:6 (7:4) esebimen jeńdi.

D.Evseev jekeleı synda fınalda fınlıandııalyq Otto Vırtanendi 5:7, 6:3, 7:6 (7:4) esebimen utyp, chempıon atandy.

Osylaısha D.Evseev ITF dodalaryndaǵy 18-inshi (sonyń 8-i jekeleı synda) tıtýlyna qol jetkizdi.

Lıtvadaǵy osy tabysynyń arqasynda Denıs aldaǵy dúısenbide álemdik reıtıngide 349-orynǵa kóteriledi.

Sondaı-aq Damır Jalǵasbaı Mınsk qalasynda 14 jasqa deıingiler arasynda ekinshi sanattaǵy Tennis Europe týrnırinde sátti óner kórsetti.

D.Jalǵasbaı áýeli belorýssııalyq Stanıslav Balıbenkomen birge juptyq syn fınalynda Vladımır Kadobıne (Belarýs) – Artemıı Lazarevti (Reseı) 6:0, 6:2 esebimen tize búktirip, chempıondyq tuǵyrǵa kóterildi. Al jekeleı synda sońǵy básekede ǵana reseılik Alekseı Frolovqa ese jiberdi – 4:6, 1:6.

Eske sala keteıik, budan buryn Aýstralııa ashyq chempıonatynda Anna Danılınanyń juptyq synda úshinshi aınalymǵa shyqqanyn jazǵan bolatynbyz.

Al Aleksandr Nedovesov úshinshi aınalymǵa shyǵa almady.

Sondaı-aq Aýstralııa ashyq chempıonatynda qos qazaqstandyq jasóspirim tennısshi baq synaıdy.


Jańalyqtar

MURAǴAT