Qazaqstandyq tennısshi Gambýrg týrnıriniń shırek fınalyna ótti

NUR-SULTAN. QazAqparat – Qazaqstannyń birinshi, álemniń 56-raketkasy Aleksandr Býblık Gambýrg ATP týrnıriniń shırek fınalyna ótti, dep habarlaıdy QazAqparat tilshisi.

Qazaqstandyq tennısshi ekinshi aınalymda álemniń 21-raketkasy, 20 jastaǵy kanadalyq Felıks Oje-Alıassımmen kúsh synasty.

Birinshi partııada kanadalyq tennısshi 3:1 esebimen alǵa shyqty. Degenmen A.Býblık tarazy basyn teńestirip qana qoımaı, setti óz paıdasyna jaza aldy – 6:4.

Ekinshi partııada qazaqstandyq sportshy birden alǵa ketti – 3:1. Sodan keıin taǵy bir breık jasap, matchqa dop bergende, múmkindigin jibergen joq – 6:2.

Báseke 1 saǵat 17 mınýtqa sozyldy.

Match barysynda kanadalyq tennısshi qatelikke jıi boı aldyrsa, Aleksandr tamasha oınap, mańyzdy jeńiske qol jetkizdi.

A.Býblık júlde qory 1,2 mln eýrodan asatyn dodanyń jartylaı fınalyna shyǵý úshin álemniń 22-raketkasy, chılılik Krıstıan Garınmen talasady. Ol ekinshi aınalymda reıtıngte 102-satydaǵy germanııalyq ıAnnık Hanfmandy 6:2, 7:6 (7:3) esebimen utty.

Eske sala keteıik, budan buryn Zarına Dııastyń Strasbýrg týrnıriniń shırek fınalyna shyǵa almaǵanyn, Dmıtrıı Popkonyń Rolan Garros jarysynda irikteý kezeńiniń fınalyna ótkenin jazǵan bolatynbyz.