Qazaqstandyq tennısshi Aýstralııa ashyq chempıonatynyń fınalynda óner kórsetedi
2022 jylǵy 29 qańtar 18:09

Qazaqstandyq tennısshi Aýstralııa ashyq chempıonatynyń fınalynda óner kórsetedi

NUR-SULTAN. QazAqparat – Qazaqstandyq Anna Danılına erteń juptyq synda Aýstralııa ashyq chempıonatynyń fınalynda óner kórsetedi, dep habarlaıdy QazAqparat tilshisi.

Qazaqstan tennıs federatsııasy málim etkenindeı, A.Danılına brazılııalyq Beatrıs Haddad Maııamen birge álemniń juptyq syndaǵy birinshi raketkalary, chehııalyqtar Barbora Kreıchıkova – Katerına Sınıakovamen bas júldeni sarapqa salady.

Danılına men Maııa bıylǵy maýsymda alǵash ret birge oınap júr. Qańtar aıynyń ortasynda olar Sıdneı WTA 500 týrnıriniń chempıony atandy. Sıdneıde qazaqstandyq-brazılııalyq jup 4 matchynyń úsheýinde sýper taı-breıkte qarsylastaryn tize búktirdi. Al Melbýrnda 5 kezdesýiniń tórteýinde úshinshi, sheshýshi sette jeńisti julyp aldy.

Chehııalyqtar fınalǵa deıin qarsylastaryna birde-bir setti berip kórgen joq. Oǵan qosa Kreıchıkova men Sınıakova bir-birine ábden tóselgen. 2018 jyly Frantsııa ashyq chempıonaty men Ýımbldonda eshkimdi shaq keltirmedi. Al ótken jyly Rolan Garros pen Gvadalaharada WTA qorytyndy týrnırinde jeńimpaz atandy. Onyń ústine Tokıo Olımpıadasynda jeńis tuǵyryna kóterildi.

Aýstralııa ashyq chempıonatyndaǵy juptyq syndaǵy fınaldyq báseke 30 qańtar kúni elorda ýaqytymen saǵat 10.00-de «Eýrosport» telearnasynan tikeleı efırde kórsetiledi.

Eske sala keteıik, budan buryn Zańǵar Nurlanulynyń Masters chempıondyq reıtıngisinde bir aı boıy kósh basynda kele jatqanyn, Aýstralııa ashyq chempıonatynda Anna Danılınanyń juptyq synda fınalǵa shyqqanyn jazǵan bolatynbyz.

Sondaı-aq tennısten jasóspirimder arasynda Qaraǵandyda eki iri jarys ótedi.


Jańalyqtar

MURAǴAT