Qazaqstandyq sportshylar Eýropadadaǵy daıyndyqtan tikeleı Beıjińge ushady – mınıstrlik
2022 jylǵy 25 qańtar 15:29

Qazaqstandyq sportshylar Eýropadadaǵy daıyndyqtan tikeleı Beıjińge ushady – mınıstrlik

NUR-SULTAN. QazAqparat – QR Mádenıet jáne sport vıtse-mınıstri Serik Jarasbaev Beıjińde ótetin Qysqy Olımpıadaǵa qazaqstandyq sportshylar qalaı jetkiziletinin túsindirdi, dep habarlaıdy QazAqparat.

«Qazirgi ýaqytta sportshylarymyz birneshe topqa bólindi. Birinshi top Eýropada daıyndalyp jatyr, sondyqtan olardyń Eýropadan tikeleı Beıjińge barý máselesin sheship jatyrmyz. Taǵy eki top – short-trek pen konkı tebýshiler elordada «Alaý» muz aıdynynda «Babl» júıesinde daıyndalyp jatyr. Qalǵan sport túrleri, frıstaıl bolsyn, qysqy kópsaıys bolsyn Almatyda «Sadý» sport bazasynda daıyndalyp jatyr. Halyqaralyq Olımpıada talaptaryna sáıkes, 14-27 qańtar aralyǵynda sol eki sport nysandarynda eshkimmen qarym-qatynas bolmaýy úshin jabylyp, «Babl» júıesinde daıyndalyp jatyr», - dedi S. Jarasbaev Ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, barlyq sportshylarymyz ekpe alǵan, olardyń densaýlyǵyna baılanysty barlyq jaǵdaı jasalǵan.

«Bizdiń ulttyq qurama komanda, onyń ishinde elordadaǵy eki komanda 27 qańtarda charterlik reıspen Almatyǵa ushady. Almatydaǵy qalǵan sportshylardy alyp, Beıjiń qalasyna ushady. Beıjińde 4 kún karantınde bolyp, ári qaraı jarystarǵa daıyndyǵyn bastaıdy», - dep túsindirdi vıtse-mınıstr.

Aıta keteıik, XXIV qysqy Olımpıada oıyndary Qytaıdyń Beıjiń qalasynda, 2022 jyldyń 4 men 20 aqpan aralyǵynda ótedi. Onda jalpy sany 109 medal sarapqa salynady. Jarystar Beıjiń qalasynan bólek onyń qasyndaǵy ıAntsın jáne Chjıantszıakoý qalalarynda da ótedi.

Buǵan deıin S. Jarasbaev Qysqy Olımpıadaǵa baratyn sportshylardyń qaı óńirlerden kóp iriktelgenin aıtqan edi.



Jańalyqtar

MURAǴAT