Qazaqstandyq «Muzbalaq» fılmi eki birdeı kınofestıvalde jeńimpaz atandy
2020 jylǵy 2 jeltoqsan 23:32

Qazaqstandyq «Muzbalaq» fılmi eki birdeı kınofestıvalde jeńimpaz atandy

NUR-SULTAN. QazAqparat - Qazaqstandyq «Muzbalaq» kartınasy eki birdeı kınofestıvalde oljaly boldy, dep habarlaıdy QazAqparat.

«Qazaqfılm» kınostýdııasy shyǵarǵan «Muzbalaq» tolyqmetrajdy anımatsııalyq fılmi dúnıejúzi kórermenderiniń júregin jaýlap jatyr.

«Kúni keshe «Muzbalaq» birden eki festıvalde – Stokgolmdaǵy kıno jáne teledıdar festıvalinde (Shvetsııa) jáne «Altyn ara» balalar fılmderiniń halyqaralyq kınofestıvalinde (Úndistan, Nıý-Delı) «Úzdik anımatsııalyq fılm» atalymynda top jardy. Shyǵarmashylyq topty osy jetistigimen quttyqtaımyz jáne kóptegen jańa jeńister tileımiz» dep jazdy «Qazaqfılm» kınostýdııasy Facebook paraqshasynda.

Aıta keteıik, «Muzbalaq» anımatsııalyq fılmi 2018 jyly túsirilgen. Rejısseri - Turdybek Maıdan, Tilek Tóleýǵazy. Stsenarıı avtorlary - Erbol Boranshy, Turdybek Maıdan, Tilek Tóleýǵazy, Adaı Ábilda.

Erte zamanda qara nıetti Shegirdiń kesirinen jer astyndaǵy ábjylan oıanyp, jer betine shyǵady. Ábjylan qazaq aýylyn otqa orap, qarsy kelgendi jalmap, el ishine úreı týǵyzady.

Sol sátte balapanyna qaýip tóngenin sezgen ana búrkit ábjylanmen aıqasyp, ony jer astyndaǵy mekenine qýyp tyǵady. Al búrkit otqa oranǵan uıadan balapanyn alyp, alysqa ushyp ketedi.

Adam jutyp dánikken ábjylan kún tutylǵanda alyp aıdaharǵa aınalyp jer betine shyǵatynyn bilgen aýyl adamdary aıdahardy tek qyran búrkit qana jeńe alatynyn túsinip, izdeýge attanady. Muzbalaqty Aqtaı men Shegir izdep tabady.

Biraq toǵyshar Shegir men aqyldy, aq júrek Aqtaı arasynda qyrandy baptaý týraly eki túrli kózqaras týyndaıdy. Muzbalaqtyń jan dúnıesin túsinip, tilin tapqan Aqtaı Muzbalaqqa erkindik syılap, onymen adal dos bolýǵa serttesedi.



Avtor:
Tilshi
Sondaı-aq... oqyńyz

Jańalyqtar

MURAǴAT