Qazaqstandaǵy Tótenshe jaǵdaı: Bas prokýratýra oqıǵanyń tolyq hronologııasyn jarııalady
2022 jylǵy 15 qańtar 22:35

Qazaqstandaǵy Tótenshe jaǵdaı: Bas prokýratýra oqıǵanyń tolyq hronologııasyn jarııalady

NUR-SULTAN. QazAqparat – Ortalyq kommýnıkatsııalar qyzmetinde ótken brıfıngide QR Bas prokýratýrasy Qylmystyq qýdalaý qyzmetiniń bastyǵy Serik Shalabaev elde bolǵan tártipsizdikterdiń tolyq hronologııasyn usyndy, dep habarlaıdy QazAqparat tilshisi.

Serik Shalabaevtyń aıtýynsha, suıytylǵan gaz baǵasynyń kúrt ósýine baılanysty narazylyq Mańǵystaý oblysynda 2022 jyldyń alǵashqy kúninde bastalǵan.

«Birinshi qańtarda Mańǵystaý oblysynyń Jańaózen qalasynda saǵat 17.20-da qala ákimdiginiń janynda qala turǵyndary jınaldy. Suıytylǵan gaz baǵasyn tómendetý talabymen el basshylyǵynyń atyna beıneótinish jazǵan soń sol kúni saǵat 18:00-de adamdar tarady. Quqyq qorǵaý organdary qarý qoldanǵan joq.

Ekinshi qańtarda Mańǵystaý oblysynda saǵat 11.00-den bastap ákimdikterge avtoparkterge, meshitke jaqyn jerde suıytylǵan gaz baǵasyn tómendetý talabymen oblys turǵyndarynyń sanktsııasyz jıyndary baıqaldy. Kún ishinde narazylyq bildirýshiler shamamen birneshe júz adamdy qurady. Jańaózen qalasynda aktsııalarǵa qatysýshylar ishki avtojoldardy japty. Quqyq qorǵaý organdary qarý qoldanǵan joq», - dedi ol.

Aıtýynsha, úshinshi qańtarda Mańǵystaý oblysynyń turǵyndaryn qoldaý maqsatynda elimizdiń basqa 7 óńirinde beıbit mıtıngiler bastalǵan.

«Tórtinshi qańtarda mıtıngiler jalǵasyp, adamdardyń sanktsııasyz jappaı jınalystary baıqalǵan óńirler sany 11-ge deıin ósti. Qatysýshylar sany 38 myńǵa deıin kúrt ósti. Almaty jáne Shymkent qalalarynda qarýly shabýyldar, órteý sonyń ishinde qyzmettik avtokólikterdi órteý bastaldy. Almaty qalasynda «Almaty Arena» sport kesheniniń janynda jınalǵan 5 myńǵa jýyq adam qala ákimdiginiń ǵımaratyna baryp, polıtsııa qyzmetkerlerimen qaqtyǵysqa tústi», - deıdi bas prokýratýra ókili.

Bas prokýratýra qylmystyq qýdalaý qyzmetiniń bastyǵy osynyń saldarynan 6 polıtsııa avtokóligi órtenip, Ulttyq ulannyń 5 áskerı qyzmetshisi jáne 15 polıtsııa qyzmetkeri jaraqat alǵanyn aıtady.

«Shymkent qalasynda 21 avtokólik zaqymdaldy. Osy kúnnen bastap qyzmetkerler men ákimshilik ǵımarttarǵa shabýyldardy qaıtarý maqsatynda quqyq qorǵaý organdary adam ómirine qaýip keltirmeıtin arnaıy quraldardy paıdalana bastady.

Besinshi qańtarda oıran salý men ǵımarattardy basyp alý 11 aımaqta jalǵasty. Olarǵa qatysýshylar sany 50 myńǵa jetti.

Tórtinshi qańtardan besinshi qańtarǵa qaraǵan túni terrorıster Almaty qalasy ákimdiginiń ǵımaratyn, altynshy qańtar kúni Almaty halyqaralyq áýejaıyn basyp aldy. Sondaı-aq, bandıtter órt sóndirý bólimin, Almaty qalalyq polıtsııa departamentin, Áýzeov jáne Jetisý aýdandyq polıtsııa basqarmalaryn basyp alýǵa áreket jasady, 7 qarý-jaraq dúkenine basyp kirdi. Ulttyq qaýipsizdik komıteti shekara qyzmetiniń 2 «Kamaz» avtokóligine polıtsııa departamentiniń 2 qyzmettik avtokóligine, qala ákimdiginiń «Nur Otan» partııasynyń ǵımarattaryna, 4 saýda ortalyǵyna, bank bólimshelerine órt qoıyldy. Almatydaǵy qarýly shabýyldarǵa qatysýshylar sany 20 myńnan asty», - dep eske aldy Serik Shalabaev.

Onyń sózinshe, Qyzylorda qalasynda shabýylshylar 9 avtokólikti órtedi, 1 jaýyngerdi kólikpen qaǵyp óltirgen.

«Áskerı qyzmetshilerden belgisiz adamdar toby avtomat pen eki tapanshany tartyp aldy. Taldyqorǵan qalasynda shabýylshylar ákimdik, polıtsııa jáne Ulttyq qaýipsizdik komıteti departamentiniń ǵımarattaryn basyp aldy. Qalada qarýly toptar júrdi. Sondaı-aq, kúsh qoldaný arqyly Aqtóbe, Atyraý, Qyzylorda, Mańǵystaý jáne Jambyl oblystarynda oblystyq ákimdikteriniń ǵımarattary basyp alyndy. Azamattardyń qaýipsizdigine tóngen qaýip-qaterge baılanysty Prezıdenttiń Jarlyqtarymen eldiń ár aımaǵynda Tótenshe jaǵdaılar engizilip, kommendanttyq saǵat belgilendi. Terrorısterdiń áreketterin úılestirýdi joqqa shyǵarý jáne olardyń baılanys quraldaryn padalanýyn jol bermeý maqsatynda ınternetti paıdalaný shekteldi», - dedi Bas prokýratýra qylmystyq qýdalaý qyzmetiniń bastyǵy.

Sondaı-aq, ol qarýly toptarǵa qarsy quqyq qorǵaýshylar men áskerıler tarapynan qashan oq atyla bastaǵanyn naqtylady.

«Altynshy qańtarda Qaýipsizdik keńesiniń sheshimimen elimizde antıterrorıstik operatsııany ótkizý jarııalandy. Onyń negizgi maqsaty – ulttyq qaýipsizdikke tónetin qaterlerdi joıý jáne azamattardyń ómiri men múlkin qorǵaý bolyp tabylady. Tek osy kúnnen bastap quqyq qorǵaý organdary men Qarýly kúshter terrorısterdi joıý úshin qarý qoldana bastady. Almatyda «Kóktóbe» telemunarasy men Ulttyq qaýipsizdik komıteti Shekara qyzmetiniń akademııasyn terrorısterdiń basyp alýyna jol berilmedi.

Ujymdyq qaýipsizdik keńesiniń sheshimimen bitimgerlik operatsııa júrgizý úshin Qazaqstanǵa UQShU kúshteriniń kontıngentteri jiberildi», - dedi Bas prokýratýra ókili.

Aıtýynsha, 7 qańtarda beıbit narazylyq sharalary Mańǵystaý, Atyraý, Aqtóbe, Qaraǵandy jáne Shyǵys Qazaqstan oblystarynda jalǵasqan.

Al 8 qańtarda jaǵdaı birtindep turaqtanyp, azamattardyń ruqsatsyz jınalýy toqtatylǵan.

Atalmysh brıfıngide Bas Prokýratýra Tótenshe jaǵdaı kezinde qaza bolǵandardyń jalpy sanyn atady.


Jańalyqtar

MURAǴAT