Qazaqstandaǵy saýda ortalyqtarynda «Tilek aǵashy» paıda bolady
2022 jylǵy 18 mamyr 19:54

Qazaqstandaǵy saýda ortalyqtarynda «Tilek aǵashy» paıda bolady

NUR-SULTAN. QazAqparat – Qazaqstanda turǵyndardy aýyr dertke shaldyqqan balalardyń tilekterin oryndaýǵa tartýdy kózdeıtin «Armandar oryndalady» respýblıkalyq aktsııasy bastaý aldy. Bul týraly Azamattyq bastamalardy qoldaý ortalyǵynyń baspasóz qyzmeti málim etti, dep habarlaıdy QazAqparat.

«Jyl sońyna deıin barlyq óńirlerde «Tilek aǵashy» jáne «Voh dream» sııaqty aktsııalardy ótkizýdi josparlap otyrmyz. Bul is-sharalar bizge aýyr dertke shaldyqqan balalardyń tilekterin oryndaýǵa tanymal adamdardy, metsenattar men demeýshilerdi, sondaı-aq belsendi azamattardy múmkindiginshe kóptep tartýǵa kómektesedi. Nur-Sultan, Almaty jáne Shymkent qalalaryndaǵy, sondaı-aq elimizdiń 14 óńirindegi saýda-oıyn-saýyq ortalyqtarynda balalardyń armandary jazylatyn «Tilek aǵashyn» ornatamyz. Bul tilekterdi kez kelgen adam oryndaı alady»

, - deıdi joba jetekshisi Shámil Vankeev.

«Voh dream» aktsııasy aıasynda tanymal tulǵalarǵa aýyr dertke shaldyqqan balalar týraly aqparat pen onyń armany jazylǵan broshıýralary bar qoraptar jiberilmek. Sondaı-aq, juldyzdar jobaǵa arnaıy rolıkterdiń júrgizýshisi retinde shaqyrylady. Rolıkter arqyly jobaǵa qatysatyn árbir balanyń armany qalaı oryndalǵanyn bilýge bolady.

Joba Aqparat jáne qoǵamdyq damý mınıstrliginiń qoldaýymen júzege asyrylady. Ol 100 balanyń tilegin oryndaýǵa múmkindik beredi degen jospar bar.

Buǵan deıin habarlanǵanyndaı, qaıyrymdylyq maqsatta jasalǵan mobıldi aýdarymdar kásipkerlik tabysqa jatpaıdy.


Jańalyqtar

MURAǴAT