Qazaqstandaǵy reformalardy iske asyrý baǵytynda EQYU-men jumys júrgizýge daıynbyz - Áshimbaev
2022 jylǵy 23 maýsym 19:54

Qazaqstandaǵy reformalardy iske asyrý baǵytynda EQYU-men jumys júrgizýge daıynbyz - Áshimbaev

NUR-SULTAN. QazAqparat - Qazaqstan Respýblıkasy Parlamenti Senatynyń tóraǵasy Máýlen Áshimbaev EQYU-nyń Demokratııalyq ınstıtýttar jáne adam quqyqtary jónindegi bıýrosynyń dırektory Matteo Mekachchımen kezdesti, dep habarlaıdy QazAqparat.

QR Parlamenti Senaty baspasóz qyzmetiniń habarlaýynsha, Máýlen Áshimbaev qazir Qazaqstan damýdyń mańyzdy kezeńine qadam basqanyn, elimizde Memleket basshysynyń bastamasymen barlyq salada júıeli reformalar júzege asyrylyp jatqanyn atap ótti.

Sondaı-aq Senat spıkeri Bıýro dırektoryna bıyl 5 maýsymda ótken referendýmǵa toqtalyp, onyń nátıjesinde Qazaqstan halqy demokratııalyq, quqyqtyq jáne ádiletti memleket qurý baǵdaryn qoldaǵanyn aıtty.

Palata tóraǵasynyń aıtýynsha, konstıtýtsııalyq reforma azamattardyń quqyqtaryn qorǵaýdy kúsheıtýdi, Parlamenttiń rólin arttyrýdy, óńirlerdi nyǵaıtýdy jáne eldegi saıası básekelestikti odan ári damytýdy qamtamasyz etedi.

«Elimizde júrgizilip jatqan barlyq ózgerister júıeli sıpatqa ıe. Qolǵa alynǵan bastamalar azamattardyń bárine birdeı teń múmkindik beretin ádil memleket qurýdy kózdeıdi. Biz Qazaqstandaǵy reformalardy iske asyrý baǵytynda EQYU ınstıtýttarymen belsendi jumys júrgizýge daıynbyz», – dedi Máýlen Áshimbaev.

Óz kezeginde EQYU-nyń Demokratııalyq ınstıtýttar jáne adam quqyqtary jónindegi bıýrosynyń dırektory Matteo Mekachchı Qazaqstannyń qańtar oqıǵasynan keıin demokratııalyq qundylyqtardyń ashyqtyǵy men ilgerileýine arnalǵan damý jolyn tańdaýy mańyzdy qadam ekenin aıtty.

Kezdesý sońynda Máýlen Áshimbaev Qazaqstannyń EQYU-men yntymaqtastyǵyn odan ári nyǵaıtýdyń mańyzy zor ekenine nazar aýdaryp, el Parlamentiniń Senaty bul jumysty DIAQB jelisi boıynsha da belsendi júrgizýge daıyn ekenin jetkizdi.


Jańalyqtar

Úrdis

MURAǴAT