Qazaqstandaǵy eń uzyn polıtseı: Boıymnyń uzyndyǵy jumysyma kómektesedi
2022 jylǵy 23 maýsym 09:03

Qazaqstandaǵy eń uzyn polıtseı: Boıymnyń uzyndyǵy jumysyma kómektesedi

ORAL. QazAqparat – Qazaqstandaǵy eń boıy uzyn polıtsııa qyzmetkeri Oral qalasynda turady. Tól merekesine oraı Batys Qazaqstan oblysy Polıtsııa departamenti patrýldik polıtsııa batalonynyń ınspektory, polıtsııa kapıtany Abaı Balabaevpen QazAqparat tilshisi áńgimelesken edi.

-Abaı Aıapbergenuly, kásibı merekeń qutty bolsyn, aldymen óz ómiriń týraly aıtyp berseń?

-Men 1993 jyly 24 qarashada Almaty qalasynda ómir esigin ashtym. Keıin ákem Aıapbergen Balabaıuly Isqaqov Oraldan bolǵannan keıin osynda kóship keldik. Ákem kásipker bolsa, anam Gúlmıra Qazaqbaıqyzy «Qazposhta» AQ bólimshesinde aǵa kassır retinde qyzmet etedi. 2012 jyly Aqtóbe zań ınstıtýtyna oqýǵa túsip, 2016 jyly támamdadym. Sol jyldan bastap Oral qalasynda ýchaskelik polıtsııa ınspektory qyzmetin atqardym. Ótken jyldyń qyrkúıeginde patrýldik polıtsııa batalonyna aýystym. Budan on jyl buryn boıym 193 santımetr bolsa, qazir 207 santımetrge jetti. Aıaqkıim ólshemi – 45. Sondyqtan kıimdi arnaıy tapsyrys boıynsha tiktirýge týra keledi. Úılenip, otaý qurǵanmyn, joldasym, eki balam bar.

-Boıdyń uzyndyǵy qyzmetińe kedergi keltirmeı me?

-Joq, keltirmeıdi, qaıta kómektesedi dep aıtar edim. Mysaly, buryn quqyq buzýshylardy ustaý kezinde olar boıdyń uzyndyǵynan da seskenedi.

Birde mynadaı oqıǵa boldy. 2020 jyly bolýy kerek, anasy kishkentaı qyzymen dúkenge ketken. Anasymen sózge keldi me eken, kámeletke tolmaǵan úlken qyzy páterdi ishinen kilttep, esikti ashpaı qoıǵan. Páter ekinshi qabatta eken. Shaqyrtý boıynsha kelgen men jertóleniń tóbesine shyǵyp, odan balkonǵa ótip, ishke kirdim. Qyz jylap otyr eken. Sosyn psıhologty shaqyrdyq. Áıteýir jasóspirim qyz zardap shekken joq. Mine, men boıymnyń uzyndyǵynan paıdany sonda kórgenmin.

Keıde jumys babymen kezdesken adamdar tańǵalady. Ásirese, balalar ata-analaryna: «Boıy uzyn polıtseıdi qara!» dep aıtyp jatady. Kúlemin de qoıamyn.

-Abaı, sportpen de aınalysatyn shyǵarsyń?

-Iá, voleıbolmen, taekvondomen aınalystym. Polıtseı bolǵannan keıin deneńdi shynyqtyryp, ár kezde babyńda júrgen mańyzdy.

-Áńgimeńe rahmet. Qyzmetińe tabys tileımin.

Eske sala keteıik, budan buryn boıy 2 metr sarbazdardyń Qyzylorda, Taldyqorǵan, Almatyda áskerı boryshyn ótep júrgenin jazǵan bolatynbyz.


Uqsas jańalyqtar

Jańalyqtar

Úrdis

MURAǴAT