Qazaqstanda ústel tennısin keńinen damytýǵa múmkindik mol – bapker
2022 jylǵy 25 maýsym 10:44

Qazaqstanda ústel tennısin keńinen damytýǵa múmkindik mol – bapker

ORAL. QazAqparat – Qazaqstanda olımpıadalyq sport túri – ústel tennısin damytýdyń múmkindikteri qandaı, qazirgi deńgeıi óskeleń talaptarǵa saı kele me? Osy baǵytta ústel tennısinen BQO quramasynyń aǵa bapkeri Sarvar Nazarova QazAqparat tilshisine suhbat berdi.

-Sarvar Rızýevna, aldymen ózińizdiń ómirlik jáne sporttyq jolyna toqtalsańyz?

-Men Ózbekstannyń Buhara qalasynda týyp-óstim. Biz oqyǵan mekteptiń mańynda balalar sport mektebi boldy, sonda ústel tennısinen de jattyǵyp jatatyn. 5-synypta sol mektepke baryp, osy sport túrine jazylyp, aınalysa bastadym. Bir jyldan keıin nátıjelerge qol jetkizdim. Jasóspirimder, keıin eresekter arasynda Ózbekstan chempıony, sport sheberligine úmitker atandym. 9-synypta oqyp júrgende, bapkerler ketip qaldy da, sonyń ornyna jarty stavkaǵa jumysqa turdym. Osylaısha, 1977 jyldan bastap balalardy baýlýǵa kiristim. 10-12 sport sheberin daıyndadym. Olar respýblıka chempıony atandy, el quramasy sapyna kirdi.

-Al, Ózbekstannan Batys Qazaqstan oblysyna qalaı keldińiz?

-Ómir bir ornynda turmaıdy. Turmysqa shyǵyp, bala súıdim. Ulym tennıs oınaǵan joq. Qyzym Gýlchehra Hýseınova osy sport túrin tańdady. Ol Ózbekstannan Qazaqstanǵa oınaýǵa kelgen kezde erekshe kózge túsip, osynda shaqyrǵan. Áli kishkentaı bolǵandyqtan, Qazaqstanǵa ata-anasymen birge kelýi kerek edi. Sóıtip 15 jasynan bastap Gýlchehra Qazaq eliniń namysyn abyroımen qorǵap keledi, kóptegen jarystarda olja saldy. Jýyrda Qostanaı qalasynda ótken VII halyq oıyndarynda áıelder arasynda chempıon atandy. Áýeli sol kezdegi Ońtústik Qazaqstan oblysy Saıram aýylyna ornalastyq. Sondaǵy zalda alty jyl boıy ter tóktim, shákirtterimniń arasynan alty birdeı sport sheberi shyqty. 2011 jylǵy qyrkúıekten bastap Batys Qazaqstan oblysyna keldik. Sodan beri qandaı da jarys bolsyn júldesiz qaıtqan kezimiz joq.

-Endeshe, Aıdos Kenjeǵulov syndy shákirtterińiz týraly aıtsańyz?

-Aıdosqa qosa Dastan Kenjeǵulov bar. Alsý Saparova, Sanjar Jubanov, sondaı-aq Serikbaı Erjigit, Gúlnaz Bulanova, Aıkórkem Batyrovalardy aıtýǵa bolady. Taıaýda Almaty qalasynda 2011 jylǵy jáne odan kishi jastaǵylar arasynda ótken el birinshiliginde Mansur Súıindik, Arsen Asqar júldege ilikti.

Eresekter arasynda Aıdos Kenjeǵulov aldaǵy Parıj olımpıadasyna beriler joldamany jeńip alý úshin shet eldegi jarystarǵa qatysyp, Aýstrııa men Qazaqstanda jattyǵýda. Basqalaryna da artylar úmit kóp.

-Bapkerlik – óte kóp ter tógýdi qajet etetin jumys qoı?

-Iá, durys aıtasyz. Ár balanyń júregine jol taýyp, jeke jumystaný qajet-aq. Kúnde solaı eńbektený kerek. Bala bapkermen qatar tennısti súıe bilýi úshin boıyndaǵy qushtarlyqty oıatý mańyzdy. Biz, árıne, elimizdegi týrnırlermen shektelgimiz kelmeıdi. Shet jerlerge shyǵyp, halyqaralyq jarystarda sheber óner kórsetý – basty maqsatymyz. Sol jolda brıgadamyzdaǵy tórt-bes bapker kún saıyn jumystanýdamyz.

-Sizdi Oral qalasynda ústel tennısine jasalǵan jaǵdaı qanaǵattandyra ma?

-Birden aıtaıyn, buryn qanaǵattandyratyn. Qazir shákirtterim ósti, eseıdi, kishkentaı zal tarlyq etýde. Jattyqqanda, bir-birine kedergi jasaıdy, zalda aýanyń ylǵaldylyǵyna deıin talapqa saı bolýy kerek. Álemdik deńgeıde oınaý úshin jaǵdaı da soǵan sáıkes bolýy tıis.

-Sizdińshe, ústel tennısi Qytaı men Koreıadaǵydaı damýy úshin Qazaqstanda ne istelýi kerek?

-Jalpy, Qazaqstanda Memleket basshysy Qasym-Jomart Toqaevtyń qoldaýymen ústel tennısi qanat jaıyp keledi. Jeti oblysta qazirgi zamanǵy ústel tennısi ortalyǵy salynǵan. Osyndaı keshen Oral qalasynda bolsa dep armandaımyn. Sonda nátıje budan da joǵary bolatyny anyq.

Árıne, Qytaı men Koreıaǵa jetý qıyn bolar. Olarda ústel tennısi ulttyq sport túrine aınalǵan, Qytaıda bul baǵytta tutastaı ýnıversıtet jumys jasaıdy.

Qazaqstanda ústel tennısin damytý úshin bapkerler máselesine basa kóńil bólý qajet. Qazirgi kezde bilikti mamandar jetispeıdi. Jalaqy tómen bolǵandyqtan, jastar arnaıy bilim alsa da, bapkerlikke jolaǵysy kelmeı, basqa salaǵa ketedi.

-Sońǵy saýal, bolashaqta Olımpıadada kimder óner kórsetedi dep oılaısyz?

-Osy kezge deıin Kırıll Gerasımenko, Anastasııa Lavrova sııaqty kóptegen tennısshilerimiz tórt jylda bir ret ótetin aıtýly dodaǵa qatysty.

Olımpıada joldamasyn jeńip alý óte qıyn. Degenmen úmit bar. Lıtsenzııa alý úshin bárimiz de uıymshyldyqpen eńbektenýdemiz. Ásirese, qaraǵandylyq, 2007 jylǵy Alan Qurmanǵalıevke zor senim artýdamyz. Ol 15 jasqa deıingiler arasynda 14 halyqaralyq týrnırde jeńimpaz atandy.

-Áńgimeńizge rahmet, bapkerlik eńbegińizge tabys tileımin.


Jańalyqtar

Úrdis

MURAǴAT