Qazaqstanda turaqty damý maqsattaryn júzege asyrýdyń ekinshi kezeńi bastalady
2022 jylǵy 19 sáýir 10:52

Qazaqstanda turaqty damý maqsattaryn júzege asyrýdyń ekinshi kezeńi bastalady

NUR-SULTAN. QazAqparat – Qazaqstan BUU-ǵa múshe memleketter qabyldaǵan turaqty damý maqsattaryn júzege asyrý jobasynyń ekinshi kezeńin bastaıdy. Bul týraly «Ekonomıkalyq zertteýler ınstıtýty» AQ basqarma tóraǵasynyń orynbasary Álıhan Abaqanov málim etti, dep habarlaıdy QazAqparat tilshisi.

«Qazaqstan táýelsizdik alǵan kúnnen bastap BUU usynǵan jahandyq turaqty damý qaǵıdattaryn ustanyp keledi. Adamzattyń turaqty damý qaǵıdaty 2030 jylǵa deıin arnalǵan jáne bizdiń el sol qaǵıdattardy kezeń-kezeńimen júzege asyryp keledi. Osy maqsatta Úkimet basshysy orynbasarynyń tóraǵalyǵymen úılestirý keńesi jumys isteıdi. Keńes otyrysyna barlyq múddeli taraptar qatysyp, ózekti máseleler qaralady. Úılestirý keńesiniń 5 jumys baǵyty bar. Ol - adamdar, jer, órkendeý, seriktestik jáne beıbitshilik», - dedi Álıhan Abaqanov Ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq, ınstıtýt ókiliniń aıtýynsha, ótken jyldan bastap elimizdiń turaqty damýyna qatysty monıtorıng júrgizetin Ulttyq ekonomıka mınıstrligi janynda keńes jumys isteıdi.

«Byltyr turaqty damýǵa qatysty ulttyq ındıkatorlar bekitildi. Qazaqstan alǵash 2019 jyly BUU-nyń turaqty damý maqsattaryn júzege asyrý boıynsha erikti ulttyq sholýyn usyndy. Bıyl elimizde turaqty damý maqsattaryn júzege asyrý boıynsha erikti ulttyq sholýdyń ekinshi kezeńi bastalady. Bul baǵytta biz ulttyq ekonomıka mınıstrligimen birlesip ekinshi ulttyq sholýdyń jobasyn ázirledik», - deıdi ol.

Eske sala keteıik, 2015 jyly qyrkúıekte BUU-ǵa múshe memleketter 2030 jylǵa deıingi turaqty damý salasyndaǵy kún tártibin qabyldady. Onda birqatar maqsattar qamtylǵan, bul rette kedeıshilikti joıý, tabıǵı resýrstardy saqtaý, adamdardyń ál-aýqatyn qamtamasyz etý sekildi baǵyttar eskerilgen. Árbir 17 maqsat birqatar kórsetkishterdi qamtıdy jáne olarǵa 15 jyldyń ishinde qol jetkizý kerek.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT