Qazaqstanda tómengi synyp oqýshylarynyń 56% úıirmege barmaıdy – zertteý

NUR-SULTAN. QazAqparat – QR Densaýlyq saqtaý mınıstrliginiń Qoǵamdyq densaýlyq saqtaý ulttyq ortalyǵy Dúnıejúzilik densaýlyq saqtaý uıymynyń qoldaýymen elimizdiń bastaýysh synyp oqýshylary arasynda zertteý júrgizdi. Zertteý Eýropa men Ortalyq Azııanyń ózge de elderin qamtydy, dep habarlaıdy QazAqparat tilshisi.

DDSU 25 eldegi balalardyń belsendiligin salystyryp, «Fızıkalyq belsendilik ekran aldynda ótkizilgen jáne uıqyǵa ketken ýaqyt» taqyrybynda esebin jarııalaǵan.

Oǵan sáıkes, DDSU 6-9 jas aralyǵyndaǵy balalarǵa kún saıyn ortasha eseppen 60 mınýt qalypty nemese joǵary qarqyndy fızıkalyq belsendilikpen aınalysýǵa keńes beredi. Al Qazaqstanda 9 jasqa deıingi balalardyń 70,6 paıyzy kúnine 1 saǵatqa jetpeıtin ýaqytyn belsendi oıynǵa bóledi. Belsendiliktiń dál osyndaı deńgeıi Ispanııa, Túrkııa, Danııa elderiniń balalary arasynda baıqalady. Túrikmenstan, Qyrǵyzstan, Reseı, Latvııa, Grýzııa, Chehııa syndy 15 elde balalardyń 82-98 paıyzy kún saıyn 1 saǵattan astam oınap, únemi qozǵalysta bolady.

Degenmen, Orta Azııa elderinde mektepke jáne mektepten úıge jaıaý baratyn nemese velosıpedpen qatynaıtyn balalardyń úlesi joǵary. Máselen, elimizde balalardyń 70,9 paıyzy mektepke jaıaý baryp kelse, Tájikstanda bul kórsetkish 94 paıyzǵa jetedi. Al Portýgalııa, Malta jáne Irlandııada bul kórsetkish shamamen 20 paıyz ǵana.

Qazaqstanda tómengi synyp oqýshylarynyń jartysy – 56 paıyzy sport nemese bı úıirmelerine barmaıdy. Eýropa elderinde, atap aıtqanda Danııa, Latvııa, Italııa jáne San-Marınoda balalardyń keminde 80 paıyzy sport nemese bı úıirmesine jazylsa, Qyrǵyzstan, Tájikstan, Túrikmenstan jáne Túrkııada balalardyń 80 paıyzy mundaı úıirmelerge múldem barmaıdy.

Osy jas tobyna kiretin balalarǵa kúnine 2 saǵatqa deıin elektrondy qurylǵy aldynda otyrýǵa keńes beriledi. Saýalnama júrgizilgen sátte Qazaqstanda ár 4 balanyń 3-eýi kún saıyn teledıdar men gadjet qaraýǵa 2 saǵatqa jetpeıtin ýaqyttaryn jumsaıtyndyǵy anyqtaldy.

Balalardyń jaqsy fızıkalyq jáne psıhıkalyq saýlyǵy úshin 9-11 saǵat uıqy barynsha ońtaıly sanalady. Qazaqstanda balalardyń 76,1 paıyzy táýligine 9-11 saǵat uıyqtaıdy.