Qazaqstanda terrorızmdi qarjylandyrýǵa qarsy is-qımyl qyzmetiniń tıimdiligi kúsheıtiledi
2022 jylǵy 28 maýsym 11:34

Qazaqstanda terrorızmdi qarjylandyrýǵa qarsy is-qımyl qyzmetiniń tıimdiligi kúsheıtiledi

NUR-SULTAN. QazAqparat – Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl, sondaı-aq memlekettik baǵa retteý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.

Sonymen qatar palata depýtattary «QR Ákimshilik quqyq buzýshylyq týraly kodeksine qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» ilespe qujatty da qabyldady.

Zań jobalarynyń maqsaty qylmystyq jolmen alynǵan kiristerdi jylystatýǵa jáne terrorızmdi qarjylandyrýǵa qarsy is-qımyl týraly zańnamany, sondaı-aq atalǵan saladaǵy ulttyq zańnamalyq júıeni nyǵaıtýǵa baǵyttalǵan.

«Qujatty daıyndaý barysynda Aqshany jylystatýǵa qarsy kúrestiń qarjylyq sharalaryn ázirleý tobynyń (FATF) usynystary erekshe taldandy. Birinshiden, BUU Qaýipsizdik keńesiniń 1617 qararyna sáıkes, FATF usynystaryn oryndaý BUU-ǵa múshe elder úshin mindetti bolady. Ekinshiden, bıyl Qazaqstan kiristerdi jylystatýǵa jáne terrorızmdi qarjylandyrýǵa qarsy is-qımyl jónindegi Eýrazııalyq toptyń baǵalaýynan ótýi tıis. Ol toptyń kóshpeli is-sharasy elimizde bıyldyń kúzinde ótedi. Sondyqtan ulttyq zańnamalarǵa FATF halyqaralyq standarty aıasynda negizgi tolyqtyrýlar engizilgen», - dedi senator Sultanbek Mákejanov.

Osy oraıda elimizdegi qoldanystaǵy 12 zań men 4 kodekske ózgeris pen tolyqtyrýlar engizilmek.

Depýtat negizgi tolyqtyrýlarǵa toqtala kele: «Birinsheden kiristerdi jylystatýǵa jáne terrorızmdi qarjylandyrýǵa qarsy is-qımyl týraly zańnamaǵa shet memlekettiń zańnamasyna sáıkes qurylǵan trasttarǵa nemese basqa da korporatıvtik qurylymdarǵa jaýapkershilik engizildi», - dedi.

Onyń aıtýynsha, qylmystyq kiristerdi jylystatqany úshin zańdy tulǵalardyń jaýapkershiligin engizý usynylyp otyr.

«Terrorızmdi qarjylandyrýǵa qatysy bar adamdardy jáne terrorızmge áreket etetin adamdarǵa tyıym salý sharalaryn qoldanatyn ózgertýler engizildi. Zań jobasynda qarjy monıtorıngi organdarynyń laýazymdy adamdaryna tıisti ákimshilik quqyq buzýshylyq hattamalaryn toltyrý ókilettigi berildi», - dedi Sultanbek Mákejanov.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT