Qazaqstanda tek qana áıelderge arnalǵan «Umaı» ıpotekasynyń talaptary ózgerdi
2022 jylǵy 28 aqpan 14:44

Qazaqstanda tek qana áıelderge arnalǵan «Umaı» ıpotekasynyń talaptary ózgerdi

NUR-SULTAN. QazAqparat - Áıelderge arnalǵan baǵdarlamanyń talaptary ózgerdi. Endi «Umaı» tabysy joǵary qyz-kelinshekterge de qoljetimdi. Іsker áıelder úshin ortaq otbasylyq tabys shegi 320 000 teńgeden 640 000 teńgege deıin kóterildi, dep habarlaıdy QazAqparat.

Áleýetti qaryz alýshynyń aı saıynǵy otbasylyq tabysy 550 000 teńgeden aspasa, ol 15%-dyq bastapqy jarnamen nesıe ala alady.

Al otbasynyń ortaq kirisi aıyna 550 001 teńgeden 630 000 teńgege deıingi aralyqta bolsa, onda turǵyn úıdi 20%-dyq alǵashqy jarnamen alýǵa bolady.

Baǵdarlama boıynsha beriletin zaemnyń eń joǵarǵy quny 30 mln teńgege deıin. Paıyzdyq mólsherleme 13,5% (JTSM - 14,5%-dan bastap) teń, keıinnen 5%-ǵa deıin (JTSM - 5,2%-dan bastap) tómendetiledi.

«Umaı» baǵdarlamasy boıynsha qaryz alý merzimi 6 aıdan 25 jylǵa deıin.

Bul rette turǵyn úı tańdaýda shekteýler joq, ony alǵashqy jáne ekinshi naryqtan, sonyń ishinde úlestik qatysý sharttary boıynsha satyp alýǵa bolady.

Sondaı-aq «Umaı» boıynsha baspanany jóndeý jumystaryna da 3,7 mln teńgege deıingi mólsherde qaryz alýǵa bolady.

Genderlik teńdikti jetildirýge negizdelgen áıelder baǵdarlamasy – Otbasy bank pen Azııa damý bankiniń birlesken jobasy.

Ony iske asyrýǵa ADB 38 mlrd teńge kóleminde qarajat bólýdi kózdep otyr. 2021 jyly «Umaı» baǵdarlamasy bastalǵan kezde, birinshi transh aıasynda, jalpy kólemi 8,4 mlrd teńgege 954 qazaqstandyq qyz-kelinshek qaryz aldy.

Atalmysh ónimge degen suranys ásirese Nur-Sultan, Qaraǵandy jáne Aqtóbe oblystarynyń turǵyndary arasynda kóbirek bolatyn.

Aýdarylatyn ekinshi transh kólemi – 14 mlrd teńgege teń bolmaq. Bıyl nesıe alý týraly ótinishter naýryz aıynyń ortasynan qabyldanady.

Bul týraly Otbasy bank klıentterine qosymsha habarlaıdy. Osy jyly ADB qaryz qarajatyn joǵary mólsherleme boıynsha ornalastyratyndyqtan, qaryz alýshylar úshin ol jyldyq 13,5%-ǵa deıin ulǵaıtyldy.

«Umaı» baǵdarlamasy – birinshi turǵyn úı satyp alýǵa múmkindik beretin memlekettik baǵdarlama emes.

Ol turǵyn úı jaǵdaıyn jaqsartý nemese balalaryna jyljymaıtyn múlik satyp alý maqsatymen, ekinshi nemese úshinshi turǵyn úı satyp alýdy kózdep otyrǵan, kirisi joǵary áıelderge arnalǵan.

Elimizdiń kóptegen qyz-kelinshekteri Otbasy bankinen alǵashqy jarnasy tómen, balabaqsha, mektep, jumysqa jaqyn bolatyn jerden, ıaǵnı ekinshi naryqtan turǵyn úı alýǵa múmkindik beretin baǵdarlama shyǵarýdy suraǵandyqtan, «Umaı» baǵdarlamasy paıda boldy.

Búgingi tańda Otbasy bankiniń nesıelik portfelindegi áıelderdiń úlesi qaryz alýshy erlermen salystyrǵanda joǵary.

Máselen, qaryzdar sany boıynsha áıelderdiń úlesi – 57% bolsa, nesıe somasy men bereshek qaldyǵy boıynsha – 53% teń.

Sońǵy 5 jyl ishinde áıelder Otbasy bankinen kredıtti erlerge qaraǵanda belsendirek alýda, olardyń kredıttik portfeldegi úlesi ózgerissiz 55-57% deńgeıinde.


Seriktester jańalyqtary

Jańalyqtar

Úrdis

MURAǴAT