Qazaqstanda sport tóreshileriniń jalaqysy qanshalyqty ósti
2022 jylǵy 1 shilde 21:29

Qazaqstanda sport tóreshileriniń jalaqysy qanshalyqty ósti

TÚRKІSTAN. QazAqparat - Búgin Mádenıet jáne sport mınıstri Dáýren Abaev Túrkistan oblysynyń turǵyndarymen kezdesti. Jıynǵa qatysýshylar óńirdegi mádenıet nysandaryn qaıta qurý, týrızm men buqaralyq sportty damytýǵa qatysty suraqtar qoıdy, dep habarlaıdy QazAqparat.

«Bizdiń búgingi kezdesýimiz-demokratııalandyrýdyń, búkil memlekettik bıliktiń transparenttiligin arttyrýdyń jáne atqarýshy organdardyń jaýapkershiliginiń taǵy bir dáleli. Memleket basshysy Qasym-Jomart Toqaevtyń tapsyrmasy boıynsha halyqpen turaqty kezdesýler «Jańa Qazaqstan» jaqsy belgisi bolýy tıis dep sanaımyn», – dedi mınıstr.

Kezdesý barysynda Dáýren Abaev sońǵy 3 jylda Túrkistan oblysynyń týrızm salasyna ınvestıtsııa kólemi 255,8 mlrd teńgege jetkenin atap ótti.

«Qysqa merzim ishinde oblysta 40-tan astam jańa qonaq úı men 30-ǵa jýyq mádenı nysan iske qosylyp týrısterge qyzmet kórsetip otyr. Olardyń biregeıi – «Kerýen saraı» kópfýnktsıonaldy týrıstik kesheni. Bul obekt óńirdiń ekonomıkasyn damytýǵa eleýli úles qosýda. Jańa 600 jumys orynymen qamtamasyz etip, 208 mln AQSh dollary kóleminde ınvestıtsııa tartyp otyr. Búgingi tańda oblys aýmaǵynda jalpy somasy 86,9 mlrd teńgeni quraıtyn 35 týrıstik ınvestıtsııalyq joba júzege asyp jatyr», – dedi mınıstr.

Sondaı-aq, mınıstrlik basshysy Túrkistan oblysynda 685 mádenıet mekemesi jumys isteıtinin habarlady.

Osy jyly óńirde 3 nysannyń qurylysy jáne 14 mádenıet nysanynyń jóndeý jumystary, sondaı-aq memlekettik tilde zaǵıp jáne nashar kóretin azamattar úshin kitaphana qoryn ulǵaıtý josparlanǵan.

Kezdesýde Dáýren Abaev basym mindetterdiń biri - buqaralyq sportty damytý ekenin atap ótti.

Osy maqsatta Túrkistan oblysynda 5 jańa nysan salý jáne 1 sport nysanyn qaıta jańartý kózdelgen.

Sonymen qatar, mınıstrlik jumysynyń mańyzdy baǵyty - sport tóreshileriniń eńbekaqysyn arttyrý.

«Biz sport tóreshileriniń eńbekaqysyn kóterýge bastamashy boldyq. Úlken jumys atqaryldy. Bul kóptegen sýdıalar úshin qosymsha motıvatsııa bolady jáne mamandyqtyń bedelin arttyrýǵa, jańa mamandardyń kelýine yqpal etedi. Saıyp kelgende, barlyǵy: sportshylar, jankúıerler jáne jalpy sala jeńetinine senimdimin. Jarystar da sapaly jańa deńgeıge shyǵýy kerek ekeni anyq. Osylaısha, 2024 jylǵa qaraı sport tóreshileriniń jumysyna aqy tóleý BLE-dan 100% deıin ulǵaıady. Bul másele uzaq ýaqyt boıy sheshilmeı keldi», - dedi mınıstr Dáýren Abaev.

Sonymen, halyqaralyq sanattaǵy ulttyq sýdıalardyń bazalyq laýazymdyq eńbekaqysy 2654,6 teńgeden 17697 teńgege deıin, joǵary sanattaǵy ulttyq sýdıalardyń eńbekaqysy 2123,6 teńgeden 15927 teńgege deıin, joǵary sanattaǵy ulttyq sýdıalardyń eńbekaqysy 2123,6 teńgeden 15927 teńgege deıin, sport boıynsha ulttyq sýdıalardyń eńbekaqysy 1769,7 teńgeden 14158 teńgege deıin, 1 kategorııaly sýdıalardyń eńbekaqysy 1415,8 teńgeden 12388 teńgege deıin, sport tóreshileriniń eńbekaqysy - 1238,8 teńgeden 10618 teńgege deıin ulǵaıady.

Bul - tóreshilerge jarystyń birinshi kúninde tórelik etkeni úshin tólenetin tólem.

Eger jarys birneshe kúnge sozylsa, bul tólem jarys kúnderiniń sanyna kóbeıtiledi. Aıta ketý kerek, bul eńbekaqy emes.

Kezdesý barysynda mınıstr barlyq qoıylǵan suraqtarǵa jaýap berdi, sondaı-aq BAQ úshin brıfıng jáne azamattardy jeke qabyldaý ótkizdi.

Sondaı-aq Dáýren Abaev oblystyń birqatar mádenı-tarıhı, sporttyq jáne týrıstik nysandaryn aralady.


Foto: gov.kz
Uqsas jańalyqtar
Seriktester jańalyqtary

Jańalyqtar

Úrdis

MURAǴAT