Qazaqstanda munaı naryǵyndaǵy qatysýshylar sanyn arttyrý usynyldy
2022 jylǵy 1 shilde 09:25

Qazaqstanda munaı naryǵyndaǵy qatysýshylar sanyn arttyrý usynyldy

NUR-SULTAN.QazAqparat - QR Premer-Mınıstri Álıhan Smaıylov Ekonomıkany demonopolızatsııalaý jónindegi komıssııanyń kezekti otyrysyn ótkizdi.

Onda Básekelestikti qorǵaý jáne damytý agenttiginiń basty taýar naryqtaryn reformalaý jónindegi usynystary qaraldy, dep habarlaıdy QazAqparat Úkimettiń resmı saıtyna silteme jasap.

Atap aıtqanda, munaı naryǵyndaǵy qatysýshylar sanyn arttyrý, sondaı-aq jalpy, munaı jáne munaı ónimderi naryǵyndaǵy jaǵdaıdy jaqsartý úshin MÓZ munaıdy jer qoınaýyn paıdalanýshylardan tikeleı satyp alý, munaıdyń bırjalyq saýda-sattyǵyn engizý, munaı ónimderin satý kólemin ulǵaıtý jáne t.b. usynyldy.

Taýarlyq gaz naryǵyn reformalaý boıynsha bırjalyq saýda-sattyqty engizý jáne jer qoınaýyn paıdalanýshylardyń taýarlyq gazǵa qol jetkizý erejelerin qabyldaý usynyldy, bul jabdyqtaýshy uıymdarǵa ony tikeleı jáne básekelestik negizde alýǵa múmkindik beredi.

Álıhan Smaıylov Energetıka mınıstrligine jáne múddeli memlekettik organdarǵa bul tásilderdi el ekonomıkasyna áser etý turǵysynan qosymsha taldaýdy tapsyrdy.

Sondaı-aq otyrysta azamattyq avıatsııa, qoǵamdyq kólik jáne qarjylyq qyzmetter naryqtaryn demonopolızatsııalaý jónindegi sharalar qaraldy. Jalpy, Úkimet basshysy avıaotynmen bırjalyq saýda-sattyq úlesin 10-nan 20%-ǵa deıin arttyrý, áýejaılarda Ashyq aspan rejımin qoldaný merzimin 3-ten 5 jylǵa deıin ulǵaıtý, el ishindegi bankter arasynda klıentterdiń aǵymdaǵy shottaryn aýdarý júıesin jáne ashyq banktik baǵdarlamalyq ınterfeıster standarttaryn (Open Banking ı Open API) engizý jónindegi usynystardy qoldady.

Sonymen qatar otyrys barysynda elektr energııasy, temirjol júk jáne jolaýshylar tasymaly naryqtaryn demonopolızatsııalaý jóninde usynystar aıtyldy.


Foto: primeminister.kz

Uqsas jańalyqtar
Seriktester jańalyqtary

Jańalyqtar

Úrdis

MURAǴAT