Qazaqstanda múgedektigi bar azamattardyń tórtten biri ǵana jumyspen qamtylǵan
2022 jylǵy 7 shilde 02:01

Qazaqstanda múgedektigi bar azamattardyń tórtten biri ǵana jumyspen qamtylǵan

NUR-SULTAN. QazAqparat – Qazaqstanda múgedektigi bar 100 myń adam jumyspen qamtylǵan. Bul – eńbek jasyndaǵy múgedektigi bar adamdardyń tórtten biri ǵana, dep habarlaıdy QazAqparat QR eńbek jáne halyqty áleýmettik qorǵaý mınıstrliginiń resmı saıyna silteme jasap.

Ondaǵy derekterge qaraǵanda, búgingi tańda múgedektigi bar adamdardy jumyspen qamtý máselesi áli de ózekti.

Adamnyń qaı toptaǵy múgedek ekeni onyń jumysqa qabilettiliginiń nemese qabiletsizdiginiń kórsetkishi emes. Múgedektigi bar 200 myńnan astam adamnyń qalypty jaǵdaıda jumys isteýge múmkindigi bar, qalǵany arnaıy jaǵdaı jasalsa jumys isteı alady. Eger memlekettiń mindeti «eńbekke qabiletti barlyq azamatty nátıjeli jumyspen qamtý úshin olarǵa bastapqyda teń jaǵdaı jasaý» desek, osy qaǵıdat múgedektigi bar adamdarǵa da qatysty bolýǵa tıis.

QR Eńbek jáne halyqty áleýmettik qorǵaý mınıstri Tamar Dúısenova kásipkerlikti damytý jónindegi ulttyq joba aıasynda múgedektigi bar 9 myń adamdy jumysqa ornalastyrý kózdelgenin, búginde olardyń 3 myńǵa jýyǵy turaqty jumyspen qamtylǵanyn aıtady.

Elektrondyq eńbek bırjasynda múgedektigi bar adamdarǵa usynylatyn Kásipter men oqýlardyń atlasy bar. Onda múgedektigi bar adamdar isteı alatyn 5 myńnan astam bos jumys orny kórsetilgen.

Memleket tarapynan mundaı sanattaǵy azamattar úshin sýbsıdııa beriletin áleýmettik jumys oryndaryn qaıta baǵdarlaý protsesi bastaldy. Búginde sol arqyly 6 myńǵa jýyq adam jumysqa ornalasty.

Múgedektigi bar adamdar úshin jańadan arnaıy jumys oryndaryn ashatyn jumys berýshilerdi sýbsıdııalaý boıynsha sharalar qabyldandy. Tek bıyldyń ózinde osy maqsatqa bıýdjetten 59 mıllıon teńge bólindi.

Múgedektigi bar adamdardyń jáne osal toptardyń basqa da sanatyna kiretin azamattardyń kásipkerlik bastamasyn qoldaý úshin 10 myń grant qarastyrylǵan. Grant mólsheri 1,2 mıllıon teńgege deıin ulǵaıdy.

«Múgedektigi bar adamdardyń qajetti daǵdysy, mashyǵy men bilimi joqtyǵy olardy jumysqa ornalastyrýǵa basty kedergi bolyp otyrǵanyn moıyndaǵan jón. Osyǵan baılanysty, Oqý-aǵartý mınıstrligimen birlesip bilim berý baǵdarlamalaryn, ásirese úıde oqytý baǵdarlamalaryn qaıta qaraý boıynsha sharalar qabyldanatyn bolady», - deıdi Tamara Dúısenova.


Uqsas jańalyqtar

Jańalyqtar

Úrdis

MURAǴAT