Qazaqstanda mektep oqýlyqtarynyń tizimi jańartyldy
2022 jylǵy 7 shilde 15:19

Qazaqstanda mektep oqýlyqtarynyń tizimi jańartyldy

NUR-SULTAN. QazAqparat – Oqý-aǵartý mınıstriniń 2022 jylǵy 21 maýsymdaǵy № 291 buıryǵymen orta bilim berý uıymdaryna arnalǵan oqýlyqtardyń, mektepke deıingi jáne orta bilim berý uıymdaryna arnalǵan oqý-ádistemelik keshenderdiń elektrondyq nysandaǵy tizbesi bekitildi, dep habarlaıdy QazAqparat.

Mınıstrdiń buıryǵy «Ádilet» normatıvtik quqyqtyq aktilerdiń aqparattyq-quqyqtyq júıesinde jarııalandy.

«Buıryqpen bekitilgen orta bilim berý uıymdaryna arnalǵan oqýlyqtardyń, mektepke deıingi jáne orta bilim berý uıymdaryna arnalǵan oqý-ádistemelik keshenderdiń, onyń ishinde elektrondyq nysandaǵy tizbesi osy buıryqqa qosymshaǵa sáıkes jańa redaktsııada jazylsyn», - delingen mınıstr buıryǵynda.

Sondaı-aq, vedomstvo basshysy Mektepke deıingi jáne orta bilim berý komıteti Qazaqstan Respýblıkasynyń zańnamasynda belgilengen tártipke sáıkes atalǵan buıryqty Ádilet mınıstrliginde memlekettik tirkeýden ótkizýin mindetteıdi.

Resmı tirkeýden ótken soń buıryq Oqý-aǵartý mınıstrliginiń resmı saıtynda ornalastyrylady.

Odan bólek, buıryqtyń alǵashqy resmı jarııalanǵan kúninen bastap qoldanysqa engiziletini aıtylǵan.

Mektep oqýlyqtary men mektepke deıingi jáne orta bilim berý uıymdaryna arnalǵan oqý-ádistemelik keshenniń elektrondyq nusqasymen osy silteme arqyly tanysýǵa bolady.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT