Qazaqstanda koronavırýs indetiniń taralýy artyp keledi - mınıstrlik
2022 jylǵy 30 maýsym 16:54

Qazaqstanda koronavırýs indetiniń taralýy artyp keledi - mınıstrlik

NUR-SULTAN. QazAqparat - Qazaqstanda aldyńǵy aptamen salystyrǵanda koronavırýs indetiniń taralýy 3,6 esege, ıaǵnı 127-den 457 jaǵdaıǵa deıin ósti. Bul týraly Densaýlyq saqtaý mınıstrliginen málim boldy, dep habarlaıdy QazAqparat tilshisi.

Taratylǵan málimetke qaraǵanda, COVID-19 aýrýynyń taralýy basqa elderde de ósip keledi. Máselen, koronavırýs ınfektsııasyna qatysty álemdik statıstıka derekteri boıynsha sońǵy 7 kúnde indet juqtyrý kórsetkishi 15 paıyzǵa, ólim-jitim 3 paıyzǵa ósti.

«Sońǵy aptada Qazaqstanda indetti juqtyrýdyń 457 jaǵdaıynyń 391-i nemese 85 paıyzy Almaty jáne Nur-Sultan qalalaryna tıesili. Júrgizilgen taldaý kezinde patsıentterdiń 80 paıyzy KVI-ge qarsy vaktsına almaǵan adamdar ekeni, sondaı-aq vaktsınalaýdan keıin 6 aıdan astam ýaqyt ótken adamdar ekeni anyqtaldy. Bul derekter vaktsınalaý KVI ınfektsııasynan qorǵaýdyń jáne ujymdyq ımmýnıtetti qalyptastyrýdyń jalǵyz tıimdi qadamy ekenin kórsetip otyr», - delingen mınıstrlik málimetende.

Qazirgi ýaqytta táýligine 20-21 myń ekpe jasalady. Osy baǵyttaǵy jumystar jalǵasyp keledi.

«Respýblıkada koronavırýs ınfektsııasyna qarsy úsh vaktsına bar. Jalpy 2,3 mln doza ekpe qamtamasyz etildi. KVI boıynsha turaqty epıdemıologııalyq jaǵdaıdy qamtamasyz etý úshin tıisti jumystar atqaralyp jatyr. Ásirese, koronavırýs aýrýy boıynsha joǵary táýekel tobyna kiretin adamdar revaktsınatsııadan ótkeni durys», - dep atalyp ótken habarlamada.


Uqsas jańalyqtar

Jańalyqtar

Úrdis

MURAǴAT