Qazaqstanda qoqysqa tastalatyn teriden túrikter jelatın óndirmek
2022 jylǵy 19 mamyr 01:13

Qazaqstanda qoqysqa tastalatyn teriden túrikter jelatın óndirmek

NUR-SULTAN. QazAqparat – Túrik kompanııasy Qazaqstanda mal terisin óńdeıtin jáne jelatın óndiretin zaýyt salmaq, dep habarlaıdy QazAqparat Aýyl sharýashylyǵy mınıstrligine silteme jasap.

Túrkııanyń Iskefe Holding kompanııasy Almaty qalasynda kompanııanyń jelatın óndirý zaýytyn salýdy ınvestıtsııalamaq. Josparlanǵan ınvestıtsııa kólemi 27 mln AQSh dollary. Joba 2022-2023 jyldar aralyǵynda iske asyp, 100-den astam jańa jumys orny ashylmaq. Kásiporyn ındýstrııalyq aımaǵynda iske qosylady, al shıkizat retinde iri qara mal terisi paıdalanylatyn bolady.

Zaýyt qurylysy bıyl bastalyp, 2023 jyly paıdalanýǵa beriledi dep boljanyp otyr, óndiris qýaty jylyna 7000 tonna jelatındi quraıdy.

«Elimizde terini bastapqy óńdeý boıynsha 9 kásiporyn jumys isteıdi. Biraq, óńdeýshi kásiporyndar aýyl sharýashylyǵy taýaryn óndirýshilerge iri qara maldyń óńdelmegen terilerin satyp alý úshin básekege qabiletti baǵa usyna almaýda. Osyǵan baılanysty iri aýyl sharýashylyǵy taýaryn óndirýshiler taýardy múmkindigine qaraı eksporttaıdy. Usaq jáne jeke qosalqy sharýashylyqtar janýarlardyń terisin qoqysqa tastaıdy, al bul óz kezeginde asa qaýipti aýrýlarynyń taralý qaýpin týdyrady. 7000 tonna jelatındi óńdeý úshin shamamen 38 myń tonnaǵa jýyq shıkizat (teri) qajet», - delingen mınıstrlik habarlamasynda.

Aıta ketsek, bul kelisimge QR Prezıdentiniń Túrkııaǵa jasaǵan sapary barysynda qol qoıylǵan. Jalpy byltyr Túrkııanyń Qazaqstanǵa tikeleı ınvestıtsııasy rekordtyq kórsetkishke jetken. Sonymen qatar Memleket basshysy Túrkııamen aradaǵy kelisimderdi júzege asyrý jeke baqylaýymda bolatynyn aıtty.




Jańalyqtar

MURAǴAT