Qazaqstanda «Kids Go Free» jobasy qalaı jumys isteıdi
2022 jylǵy 28 mamyr 13:06

Qazaqstanda «Kids Go Free» jobasy qalaı jumys isteıdi

NUR-SULTAN. QazAqparat – Bıyl elimizde «Kids Go Free» jobasy pılottyq rejımde iske qosyldy. Atalǵan baǵdarlama 2-17 jastaǵy balalar men jasóspirimderge el ishinde saıahat jasaǵanda tegin ushýǵa múmkindik beredi. Osy oraıda jańa jobanyń tıimdi jáne tıimsiz tustary týraly QazAqparat tilshisi «Kazakh Tourism» AQ ulttyq kompanııasynyń basqarýshy dırektory Danıel Serjanulymen tildesken edi.

«Kids Go Free» jobasynyń ataýyna qarap kóbisi shatastyryp jatady. ıAǵnı ataýynda «bala» sózi bolǵandyqtan tek qana balalarǵa arnalǵan dep oılaıdy. Al negizinde «Kids Go Free» otbasylyq týrızmdi damytýǵa arnalǵan baǵdarlama. Iá, atalǵan joba tikeleı balalarǵa qatysty, degenmen olar saıasattaǵanda qasynda ata-anasy, baýyry nemese basqa da jaqyn adamdar bolady. «Kids Go Free»-ge qatysty ekinshi jaıt, bul baǵdarlamany saıahattaý týryn salalyq fırma nemese týrıstik operatorlardan satyp alǵanda ǵana qoldanýǵa bolady. Demek otbasy ózdikterinen saıahattap júrse, bul múmkindikti qoldana almaıdy. Mindetti túrde týr satyp alýy tıis», - dedi Danıel Serjanuly.

Búginde «Kids Go Free» baǵdarlamasyn qoldanýǵa 80 ótinish kelip tústi. Olardy balalardyń sanyna shaqqanda 150-ge jetip qalady.

Sondaı-aq «Kazakh Tourism»-niń basqarýshy dırektory «Kids Go Free» jobasymen jumys isteıtin týrıstik fırmalar men operatorlardyń jumys isteý mehanızmin túsindirip berdi.

«Olar eki túrli ádispen jumys isteıdi. Keıbir týrıstik operatorlar otbasy týrdy rásimdegen kezde balaǵa jasalatyn jeńildikti sol sátte óz qaltasynan óteıdi. Mysaly, bir otbasy týr rásimdep, ol 500 myń teńgege shyqty delik. Atalǵan otbasynda bir bala bar, onyń bıletiniń quny shamamen 50 myń teńge delik, osy jerde týrıstik kompanııa 50 myń teńgeni ózi tóleıdi.

Al ekinshi jumys isteý tásili boıynsha otbasy týrdyń tolyq somasyn ózi óteıdi, saıahattap kelgen soń qujattardy týrdy satyp alǵan mekemege tapsyrady. Sodan soń ǵana balalarǵa arnalǵan bılettiń quny ol otbasyǵa keri qaıtarylady», - deıdi ol.

Onyń aıtýynsha, atalǵan jobanyń basty maqsaty – elimizde júıeli týrızmdi damytý.

«Iá, qazaqstandyqtardyń deni el ishinde arnaıy týr satyp alyp saıahattamaıdy. Saıahattaıtyn, demalatyn jerge tikeleı bara salady. Osy oraıda «Kids Go Free» baǵdarlamasynyń dittegeni Qazaqstanda júıeli, uıymdasqan týrızmdi ilgeriletý. Osy joba arqyly elimizde júıeli týrızmdi damytqymyz keledi. Jalpy týrızmdi damytýda týrısterdiń legin basqarý degen uǵym bar. Ol degenimiz týrısterdiń saıahattaýy, demalýy týraly derekterge súıene otyryp, olardyń legi men týrızmdi odan ári qaı baǵytta damytý kerektigin anyqtaý. Sol úshin esep júrgiziledi», - dedi D. Serjanuly.

Aıta keteıik, «Kids Go Free» baǵdarlamasy bıyl jyl basynda iske qosyldy. Qazir elimiz boıynsha 17 týrıstik operator atalǵan baǵdarlamamen jumys isteıdi.

«Kids Go Free» baǵdarlamasyn alǵashqylardyń biri bolyp qoldaǵan bizdiń kompanııa. Atalǵan júıemen jumys isteýge baǵdarlama iske qosylǵan kúnnen bastap kettik. Mendegi derekke sáıkes, joba bastalǵaly bizdiń mekeme arqyly 700-ge jýyq adam «Kids Go Free» baǵdarlamasynyń ıgiligin kórdi. Suranys aqyryndap artyp keledi. Atalǵan joba tek ishki týrızmdi damytý úshin ǵana emes, shaǵyn jáne orta bıznesti qoldaýda da mańyzdy. Bul otandyq týrıstik kompanııalardyń qyzmetin ilgerilete túsý jolyndaǵy oń qadam», - dedi Eráli Tileýov «Kompas týr» týrıstik operatorynyń jetekshisi.

«Ózderińiz bilesizder, Memleket basshysynyń bastamasymen bıyl elimizde Balalar jyly atalyp ótilýde. «Kids Go Free» baǵdarlamasy týraly men áleýmettik jeliden oqyp, bildim. Bıyl 8 naýryz mekeresine oraı otbasymyzben Túrkistan oblysyna sapardy josparladyq. Týrdy rásimdeý kezinde kompanııa ókilderi «Kids Go Free» baǵdarlamasynyń baryn aıtyp, bizge usyndy. Biz tıisti qujattardy tapsyryp, múmkindikti paıdalandyq. Sapar kezinde bizben birge 4 bala boldy», - deıdi «Kids Go Free» baǵdarlamasyn qoldanǵan týrıst Zámzagúl Raıhanova.


Uqsas jańalyqtar

Jańalyqtar

MURAǴAT