Qazaqstanda halyqtyń tabıǵı ósimi 10% kemip, qaıtys bolǵandar sany artty
2022 jylǵy 16 mamyr 22:52

Qazaqstanda halyqtyń tabıǵı ósimi 10% kemip, qaıtys bolǵandar sany artty

NUR-SULTAN. QazAqparat - Ulttyq statıstıka bıýrosy qańtar-naýryzdaǵy demografııalyq ahýal jóninde málimet taratty, dep habarlaıdy QazAqparat.

1 sáýirge deıin elimizdegi halyq sany 19 178,8 myń adamdy qurady.

Onyń ishinde qalalyqtar – 11 419,8 myń (59,5%), aýyldyqtar – 7 759 myń adam (40,5%).

2021 jylǵy 1 sáýirmen salystyrǵanda halyq sany 238,3 myń adamǵa nemese 1,3% ósti.

Halyqtyń tabıǵı qozǵalysy

2022 jylǵy qańtar-naýryzda respýblıka halqynyń tabıǵı ósimi 2021 jylǵy qańtar-naýryzben salystyrǵanda (64,3 myń adam) 10,6% kemip, 57,5 myń adamdy qurady.

Tabıǵı ósimniń jalpy koeffıtsıenti - 1000 adamǵa shaqqanda 12,13 adam.

2022 jylǵy qańtar-naýryzda týǵandar sany - 95,6 myń.

Bul 2021 jylǵy qańtar-naýryzǵa (100,5 myń adam) qaraǵanda 4,8% az. Týýdyń jalpy koeffıtsıenti - 1000 adamǵa 20,16.

Qarastyrylyp otyrǵan kezeńde qaıtys bolǵandar sany 38,1 myń adamdy qurady, bul 2021 jylǵy qańtar-naýryzǵa (36,1 myń adam) qaraǵanda 5,4% kóp.

Ólim-jitimniń jalpy koeffıtsıenti - 1000 adamǵa 8,03 qaıtys bolǵan adam.

2022 jylǵy qańtar-naýryzda respýblıkada 1 jasqa deıin shetinegen 828 náreste tirkeldi.

2021 jylǵy tıisti kezeńmen salystyrǵanda (815 shetinegen náreste) 1,6% artty. Náreste ólim-jitiminiń koeffıtsıenti 1000 týǵanǵa shaqqanda 8,66 oqıǵany qurady.

Halyqtyń kóshi-qony

Kóshi-qon qyzmeti organdary usynǵan málimetterdi óńdeý nátıjesinde, 2022 jylǵy qańtar-naýryzda elimizge turǵylyqty turýǵa kelgenderdiń tirkelý sany - 4 108 adamdy, elimizden ketkenderdiń sany - 5 281 adamdy, kóshi-qonnyń aıyrymy – 1 173 adamdy qurady.

TMD elderinen kelgenderdiń jáne sol elderge ketkenderdiń kóship-qonýshylardyń jalpy sanynan úlesi - 86% jáne 80,8%.

El ishinde qonys aýdaratyn kóship-qonýshylar sany 12,6%-ǵa kemidi. Óńiraralyq qonys aýdarý boıynsha halyq kóshi-qonynyń oń aıyrymy elimizdiń 3 óńirinde baıqaldy: Nur-Sultan (7 523 adam), Almaty (8 278 adam) jáne Shymkent (866 adam) qalalarynda.


Jańalyqtar

MURAǴAT