Qazaqstanda eńbek jasyndaǵy múgedekterdiń 25 paıyzy ǵana jumys isteıdi
2022 jylǵy 5 shilde 13:16

Qazaqstanda eńbek jasyndaǵy múgedekterdiń 25 paıyzy ǵana jumys isteıdi

NUR-SULTAN. QazAqparat – QR Eńbek jáne halyqty áleýmettik qorǵaý mınıstri Tamara Dúısenova múgedektigi bar adamdardy jumyspen qamtý máselesi áli de ózekti ekenin aıtty, dep habarlaıdy QazAqparat tilshisi.

«Búginde múgedektigi bar 100 myń azamat jumys istep júr. Bul – eńbek jasyndaǵy múgedektigi bar adamdardyń tórtten biri ǵana degen sóz. Adamnyń qaı toptaǵy múgedek ekeni onyń jumysqa qabiletiniń nemese qabiletsizdiginiń kórsetkishi bolyp sanalmaıdy. Múgedektigi bar 200 myńnan astam adamnyń qalypty jaǵdaıda jumys isteýge múmkindigi bar, qalǵany arnaıy jaǵdaı jasalsa jumys isteı alady. Memlekettiń mindeti – eńbekke qabiletti barlyq azamatty nátıjeli jumyspen qamtý úshin olarǵa bastapqyda teń jaǵdaı jasaý desek, osy qaǵıdat múgedektigi bar adamdarǵa da qatysty bolýǵa tıis», - dedi Tamara Dúısenova Úkimettiń búgingi otyrysynda.

Sondyqtan, mınıstrdiń aıtýynsha, ulttyq jobalar aıasynda múgedektigi bar 9 myń adamdy jumysqa ornalastyrý kózdelgen.

Búginde olardyń 3 myńǵa jýyǵy turaqty jumyspen qamtylǵan.

Elektrondy eńbek bırjasynda arnaıy Kásipter men oqýlardyń atlasy bar. Búginde onda múgedek adamdar isteı alatyn 5 myńnan astam bos jumys orny kórsetilgen.

Sonymen birge sýbsıdııa beriletin áleýmettik jumys oryndaryn qaıta baǵdarlaý protsesi bastalyp ketti.

Búginde sol arqyly 6 myńǵa jýyq adam jumysqa ornalasty. Jańadan arnaıy jumys oryndaryn ashatyn jumys berýshilerdi sýbsıdııalaý sharalary iske asýda.

Tek bıyl osy maqsatqa bıýdjetten 59 mıllıon teńge bólindi. Osal toptar sanatyndaǵy azamattardyń kásipkerlik bastamasyn qoldaý úshin 10 myń grant qarastyryldy.

Grant mólsheri 1,2 mıllıon teńgege deıin ulǵaıdy.

«Jasalǵan sharalarǵa qaramastan, múgedektigi bar adamdardyń qajetti daǵdysy, mashyǵy men bilimi joqtyǵy olardy jumysqa ornalastyrýǵa basty kedergi bolyp otyrǵanyn moıyndaǵan jón. Osyǵan baılanysty, Oqý-aǵartý mınıstrligimen birlesip bilim berý baǵdarlamalaryn, ásirese úıde oqytý baǵdarlamalaryn qaıta qaraý boıynsha sharalar qabyldanady», - dedi Tamara Dúısenova.

Buǵan deıin Eńbek mınıstri aýyldyq jerlerde múgedektigi bar jandar úshin syıymdylyǵy shaǵyn úıler ashylatynyn aıtqan edi.

Sonymen birge, múgedektigi bar jandarǵa qoljetimdi nysandar standartyn qaıta qaraý kerek.


Ashyq kózderden alynǵan foto

Jańalyqtar

Úrdis

MURAǴAT