Jańalyqtar  >
Qazaqstanda elektr energııasyn óndirýdiń shekti tarıfteri qaıta qaraldy
2022 jylǵy 16 tamyz 14:43

Qazaqstanda elektr energııasyn óndirýdiń shekti tarıfteri qaıta qaraldy

NUR-SULTAN. QazAqparat – Energetıka vıtse-mınıstri Jandos Nurmaǵanbetov Qazaqstanda elektr energııasyn óndirýdiń shekti tarıfteri qaıta qaralǵanyn aıtty, dep habarlaıdy QazAqparat tilshisi.

«Shekti tarıf jobasy Memleket basshysynyń tapsyrmasyn oryndaý aıasynda stantsııa personalynyń jalaqy deńgeıin tıisti óńirler boıynsha ortasha kórsetkishke deıin jetkizýdi eskeredi. Osy oraıda Qazaqstannyń energııa óndirýshi uıymdary sáýir aıynda toptar boıynsha shekti tarıfterdi túzetýge ótinim berdi. Energııa óndirýshi 47 uıymnyń 26-synan ótinim tapsyryldy. Olardy qaraý kezinde mınıstrlik árbir jaǵdaı boıynsha jeke tásil qoldandy. Der kezinde sheshimdi talap etetin ótinimder nazarǵa alyndy», - dedi J.Nurmaǵanbetov.

Buıryq jobasy 2022 jylǵy 9 maýsymda Ashyq NQA saıtynda jarııalandy. «Atameken» Ulttyq kásipkerler palatasymen jáne Energetıka mınıstrliginde akkredıttelgen saraptamalyq uıymdarmen talqylaý júrgizildi. Buıryq jobasy qoǵamdyq keńeste qaralyp, Ashyq NQA portalynyń elektrondyq alańynda talqylandy.

«Tarıfterdi túzetý bıylǵy 30 maýsymda «Elektr energııasyna shekti tarıfterdi bekitý týraly» Energetıka mınıstriniń 2018 jylǵy 14 jeltoqsandaǵy № 514 buıryǵyna ózgeris engizý týraly» Energetıka mınıstriniń buıryǵymen júrgizildi. Osy buıryq 2022 jylǵy 1 shildeden bastap engizildi. Qazaqstan boıynsha energııa óndirýshi uıymdardyń shekti tarıfteriniń ortasha ósýi 10-12 paıyz deńgeıinde eskerilgen», - dedi vıtse-mınıstr.

Bul rette, Qazaqstannyń birtutas elektr energetıkalyq júıesiniń batys aımaǵynan basqa Qazaqstannyń barlyq óńirleri boıynsha elektr energııasyn ótkizetin Ekibastuz

GRES-1-niń shekti tarıfi ózgerissiz qaldy.

«47 energııa óndirýshi uıymnyń 21-inde tarıf burynǵy deńgeıde saqtaldy. Elektr energııasyna shekti tarıfterdi qaıta qaraý energııa óndirýshi uıymdardyń óndiristik personalynyń jumysyn qamtamasyz etýge, sondaı-aq energetıka slasynyń jaǵdaıyn jaqsartýǵa múmkindik beredi», - dedi Jandos Nurmaǵanbetov.

Budan buryn habarlanǵandaı, Jandos Nurmaǵanbetov Qazaqstannyń elektr energetıkasy salasyndaǵy eskirgen aktıvterdi jańartý kerek ekenin aıtty.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT