Qazaqstanda dárilik zattardyń 90%-yna shekti baǵalar byltyrǵy deńgeıde saqtaldy - mınıstrlik
2022 jylǵy 29 mamyr 11:28

Qazaqstanda dárilik zattardyń 90%-yna shekti baǵalar byltyrǵy deńgeıde saqtaldy - mınıstrlik

NUR-SULTAN. QazAqparat - 11 qańtardan 21 sáýirge deıingi «100 kún – 100 suraq» áleýmettik jobasy aıasynda Densaýlyq saqtaý mınıstrligine 1588 ótinish pen usynys tústi, dep habarlaıdy QazAqparat vedomstvonyń Telegram-arnasyna silteme jasap.

Mınıstrlik barlyq ótinishter men usynystarǵa jedel jaýap berdi. Aıta ketý kerek, «100 kún – 100 suraq» jobasy densaýlyq saqtaý salasynda Qazaqstan azamattarynyń aldynda turǵan áleýmettik qıyndyqtardy anyqtaýǵa múmkindik berdi. El ishinde dárilik zattardyń 90%-yna shekti baǵalar byltyrǵy deńgeıde saqtaldy.

«Suraqtar men ótinishterdiń bir bóligi dári-dármekpen qamtamasyz etý taqyrybyna baılanysty. Qazaqstandyqtar dárilik zattardyń bar bolýyna alańdaýshylyq bildirgen. Sonymen birge, mınıstrlik turaqty negizde dárilik zattar men medıtsınalyq buıymdardyń qoljetimdiligin qamtamasyz etý boıynsha jumys júrgizýde. Bólshek saýda sektoryndaǵy dárilik preparattarǵa baǵa belgileý bóliginde kóterme jáne bólshek saýda úshin dárilik zattardyń 7 256 ataýyna shekti baǵalar bekitildi», - delingen habarlamada.

Onda jazylǵandaı, dárilik zattardyń 6 600 saýda ataýyna nemese dárilik zattardyń 90%-yna shekti baǵalar byltyrǵy deńgeıde saqtaldy, 153 preparatqa tómendedi. Qazirgi ýaqytta baǵany retteýdi jetildirý maqsatynda kóterme jáne bólshek saýdada dárilik zattardyń baǵalaryn qaıta retteý boıynsha túzetýler engizilýde.

«Sondaı-aq, «SQ-Farmatsııa» JShS - Biryńǵaı dıstrıbıýtor ambýlatorııalyq dári-dármekpen qamtamasyz etý jáne statsıonarlar úshin dárilik zattar men medıtsınalyq buıymdardyń 95%-dan astamyn satyp alýdy júzege asyrǵanyn atap ótken jón. Biryńǵaı dıstrıbıýtordyń qoımalaryna dárilerdiń 60%-dan astamy jetkizildi. Bólshek segmentte respýblıkanyń barlyq óńirinde turaqtandyrý qorlarynda jáne iri kóterme dárihana qoımalarynda dárilik zattar qory qalyptastyrylǵan», - dep habarlady mınıstrlik.


Avtor:
Tilshi

Jańalyqtar

MURAǴAT