Qazaqstanda birqatar sportta bas bapkerler qyzmetinen bosatyldy
2022 jylǵy 29 sáýir 16:36

Qazaqstanda birqatar sportta bas bapkerler qyzmetinen bosatyldy

NUR-SULTAN. QazAqparat – Elimizde birqatar sport túri boıynsha bas jattyqtyrýshylar jumysynan bosatyldy. Bul týraly QR Mádenıet jáne sport mınıstrligi sport jáne dene shynyqtyrý isteri komıtetiniń tóraǵasy Samat Erǵalıev málim etti, dep habarlaıdy QazAqparat tilshisi.

«Búgingi tańda mınıstrlik respýblıkalyq sport federatsııalarymen birlese otyryp, birqatar olımpıadalyq sport túrinen bas jattyqtyrýshylardy aýystyrdy. Oǵan sebep – ulttyq qurama sportshylarynyń keshendi jáne halyqaralyq jarystarda tómen nátıje kórsetýi», - dedi Samat Erǵalıev ortalyq kommýnıkatsııalar qyzmeti alańynda ótken baspasóz máslıhatynda.

Komıtet basshysynyń málimdeýinshe, aldaǵy ýaqytta bas jattyqtyrýshylardyń jumysy zańmen rettelmek.

«Aıta ketý kerek, bizdiń zańnamada bas bapkerlerdi jumystan bosatýdyń naqty krıterııleri joq. Sondyqtan qazir bul máseleni kóterip, ony zańnamalyq turǵydan túzetemiz», - deıdi ol.

Eske sala ketsek, buǵan deıin Mádenıet jáne sport mınıstri Dáýren Abaev birqatar sportta bas jattyqtyrýshylardyń qyzmetten ketýi múmkin ekenin aıtqan edi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT