2021 jylǵy 21 aqpan 04:23

Qazaqstanda bir jylda 769,3 myń tonna armatýra óndirildi.

NUR-SULTAN. QazAqparat - 2020 jyly Qazaqstanda 769,3 myń tonna armatýralyq ónim óndirildi, dep habarlaıdy QazAqparat Indýstrııalyq damý jáne ónerkásiptik qaýipsizdik komıtetine silteme jasap.

Otandyq qurylys ındýstrııasyn damytý úshin ishki naryqqa 574,1 myń tonna armatýra jóneltildi. Bir tonnasy ortasha alǵanda 311,4 myń teńgeden satyldy.

Qurylys armatýrasyn elimizde bes kompanııa óndiredi. Jobalyq qýaty jylyna 1,42 mln. tonnany quraıdy.

Olardyń ishinde elimizdegi eń iri metallýrgııalyq kásiporyn - «ArselorMıttal Temirtaý «AQ, usaq surypty prokat shyǵaratyn «EvrazKaspıan Stal» JShS zaýyty, «Kastıng» JShS kóp salaly kásiporny, munaı-gaz salasyna arnalǵan jiksiz bolat qubyrlar shyǵaratyn alǵashqy otandyq kásiporyn - «KSP Steel «JShS jáne qara metaldan jasalǵan buıymdar shyǵaratyn «FerrumVtor» JShS kompanııasy.

Sonymen qatar, Qazaqstan kórshi memleketterden 550,6 myń tonna armatýralyq ónim ımporttady. Jetkizý qashyqtyǵyna, armatýranyń túri men synybyna baılanysty Reseıden ákelinetin ónimniń baǵasy 1 tonnasyna 320 myńnan 380 myń teńgege deıin (Nur-Sultan 320 - 340 myń tg/tn, Almaty 340 - 350 myń tg/tn jáne Shymkent - 350 - 380 myń tg/tn) quraıdy. Baǵaǵa qatysty júrgizilgen salystyrmaly taldaý kórsetkendeı, Reseıden ımporttalatyn armatýralyq ónim otandyq ónimge qaraǵanda 3-18% qymbat. Baǵadaǵy aıyrmashylyq ortasha eseppen 1 tonnasyna 9 myńnan 69 myń teńgege deıingi aralyqta.

Sonymen qatar, QR Ulttyq statıstıka bıýrosynyń derekteri boıynsha 2020 jyly armatýra eksporty 195,2 myń tonnany qurady. Óz elimizde óndirilgen armatýralyq ónimdi jáne ımportty qosa alǵanda, jalpy ishki tutyný kólemi 1,12 mln. tonnany qurady.

Bıyl Taraz jáne Shymkent qalalarynda jalpy qýaty jylyna 280 myń tonna bolatyn («Taraz armatýralyq zaýyty» JShS, «SinuanSteel» JShS) eki jobany iske qosý josparlanyp otyr.

Jańalyqtar

MURAǴAT