Qazaqstanda bir aıda 1,5 myńnan astam zańsyz qoqys úıindisi anyqtaldy
2022 jylǵy 4 shilde 20:30

Qazaqstanda bir aıda 1,5 myńnan astam zańsyz qoqys úıindisi anyqtaldy

NUR-SULTAN. QazAqparat – Qazaqstanda jyl saıyn 4,5 mln tonnaǵa jýyq turmystyq qatty qaldyqtar shyǵarylady, al ruqsat etilmegen qoqys oryndarynyń úlesi ótken jyly 7 400-ge jetti. Bul týraly QR Ekologııa, geologııa jáne tabıǵı resýrstar vıtse-mınıstri Zúlfııa Súleımenova aıtty, dep habarlaıdy QazAqparat tilshisi.

«Qazaqstanda jyl saıyn 4,5 mln tonnaǵa jýyq turmystyq qatty qaldyqtar shyǵarylady. 2021 jyly qaıta óńdeý men kádege jaratý úlesi ósip, 21,1% boldy. Degenmen, qaldyqtardyń paıda bolý kólemin eskersek, bul kórsetkish jetkiliksiz», - dedi Zúlfııa Súleımenova elordada Green energy and waste recycling forum jıynynda.

Spıker zańsyz polıgondardy anyqtaý úshin Ekologııa mınıstrligi «Qazaqstan Ǵarysh Sapary» kompanııasymen birge jumys istep jatqanyn aıtty. Sondaı-aq, ótken jyly Qazaqstanda 7 400-ge jýyq zańsyz qoqys úıindisi anyqtalǵanyn, olardyń kópshiligi joıylǵanyn aıtty.

Odan bólek, Zúlfııa Súleımenova bıylǵy zańsyz qoqys kórsetkishterine de toqtaldy.

«Bıyl mamyr aıynyń basynda ruqsat etilmegen polıgondardy anyqtaı bastadyq. Maýsym aıynyń ortasyna deıin shamamen myń jarymnan astam ruqsat etilmegen qoqys oryndary anyqtaldy. Munyń bári máseleniń qandaı aýqymdy ekenin kórsetedi. Jergilikti jáne atqarýshy organdarmen birge qoqys tastaıtyn jerlerdi joıý jumystaryn júrgizip jatyrmyz. Bul polıgondar men qaldyqtar paıda bolmas úshin biz ne isteı alatynymyzdy jáne ne isteýimiz kerek ekenin qarastyrýymyz qajet», - dedi vıtse-mınıstr.

Forým barysynda Zýlfııa Súleımenova 2030 jylǵa deıin jasyl ekonomıkaǵa kóshý jónindegi tujyrymdamaǵa birqatar ındıkator men kórsetkish engizilgenin, onyń ishinde qaldyqtardy qaıta óńdeý úlesin 2030 jylǵa qaraı 40%-ǵa jáne 2050 jylǵa qaraı 50%-ǵa jetkizý bar ekenin eske saldy.

«Birqatar shara qabyldadyq. Jańa ekologııalyq kodeks ázirlendi, ol 2021 jylǵy 1 shildeden bastap kúshine endi. Qaldyqtardy qaýipsiz basqarýdy uıymdastyrýdyń negizin qaladyq. Birinshi kezekte, fraktsııalar boıynsha qaldyqtardy bólek jınaýǵa qoıylatyn talaptar belgilendi. Qaldyqtardyń qozǵalysyn baqylaý úshin olardy túgendeý týraly esepti ońtaılandyrdyq. Qaldyqtardy basqarý júıesiniń negizgi ótkizýshisi – jergilikti atqarýshy organdar. Biz olarǵa quzyretterdiń bir bóligin berdik. Sonymen qatar, árbir jergilikti atqarýshy organ ózinde qaldyqtardy basqarý baǵdarlamasyn ázirleýi tıis», - dep túsindirdi ol.


Uqsas jańalyqtar

Jańalyqtar

Úrdis

MURAǴAT