Qazaqstanda azamattardy áskerge shaqyrý ýchaskelerine tirkeý naýqany ótýde
2022 jylǵy 24 qańtar 15:54

Qazaqstanda azamattardy áskerge shaqyrý ýchaskelerine tirkeý naýqany ótýde

NUR-SULTAN. QazAqparat - Áskerı esepke alýdyń alǵashqy rásimin jergilikti áskerı basqarý organdary júrgizedi. Aldyn ala áskerge shaqyrý ýchaskelerine 17 jastaǵy 100 myńnan astam jasóspirim tirkeledi, dep habarlaıdy QR QM baspasóz qyzmeti.

Áskerge shaqyrý pýnkterine kelýge 2005 jyly týǵan jasóspirimder shaqyrý qaǵazyn alady. Olar barlyq qajetti qujattarmen jergilikti áskerı basqarý organdaryna kelýge mindetti.

Jergilikti atqarýshy organdardyń sheshimimen azamattardy tirkeý jáne medıtsınalyq kýálandyrý jónindegi komıssııalar quryldy.

Tirkeý barysynda bolashaq áskerge shaqyrylýshylardyń sany, áskerı qyzmetke jaramdylyq sanaty, dene daıarlyǵynyń deńgeıi aıqyndalady.

Densaýlyq jaǵdaıy erekshe baqylaýǵa alynady. Árbir jas azamat mindetti medıtsınalyq tekserýden ótedi. Jasóspirimderde qandaı da bir syrqat anyqtalǵan jaǵdaıda, olar tıisti emdelý úshin densaýlyq saqtaý uıymdaryna tirkeledi.

Barlyq rásimderden ótkennen keıin áskerge shaqyrý jasyna deıingilerge áskerı esepke qoıý týraly tirkeý kýálik beriledi.

– Tirkeý kýáligi – áskerı bılet sııaqty mańyzdy qujat. Bul jas adam qyzmetke shaqyrylǵanǵa nemese zapasqa shyǵarylǵanǵa deıin jaramdy. Áskerı esepten shyǵarylǵannan keıin jáne áskerı bıletti alǵannan keıin tirkeý kýáligi alynyp, ony jergilikti áskerı basqarý organyna joıýǵa beriledi, – dep túsindirdi Uıymdastyrý-jumyldyrý jumystary departamenti bastyǵynyń orynbasary polkovnık Azamat Dosymov.

Sonymen qatar, jergilikti áskerı basqarý organdary jasóspirimderge áskerı qyzmettiń artyqshylyqtary men perspektıvalary, Qazaqstan Qorǵanys mınıstrliginiń jáne alys-jaqyn shetelderdiń áskerı oqý oryndaryna túsý erejeleri jóninde aqparat beriledi.

Esterińizge sala ketsek, respýblıkada áskerge shaqyrý ýchaskelerine tirkeý jyl saıyn qańtar men naýryz aralyǵynda júrgiziletin mindetti rásim bolyp tabylady.


Jańalyqtar

MURAǴAT