Qazaqstanda áskerı qyzmetkerlerdiń zeınetaqysy qashan qaıta esepteýden ótedi
ASTANA. QazAqparat – QR Eńbek jáne halyqty áleýmettik qorǵaý mınıstrliginde 1998 jyldyń 1 qańtarynan keıin ásker qataryna kelgenderdiń jáne 2016 jyldyń 1 qańtaryna deıin qyzmetinen bosatylǵan áskerılerdiń zeınetaqymen qamtamasyz etilýin qaıta qaraý boıynsha jumys toby quryldy, dep habarlaıdy QazAqparat tilshisi.
Búgin Senatta atalǵan vedomstvonyń basshysy Tamara Dúısenova 2016 jyldan bastap áskerı qyzmetshilerdi zeınetaqymen qamtamasyz etý tolyqtaı memlekettik deńgeıge ótkenin aıtty. Olardyń ortasha eńbek ótili shamamen 20 jyldy quraıdy.
«Olar 20 jylda ózderine zeınetaqy jınaqtaryn tıisti deńgeıde qamtamasyz ete almaıdy. Bul merzimde zeınet jasyna deıin jetkilikti qor jınalmaıtyny anyq. Osy oraıda 2016 jyldan beri olar tolyqtaı memlekettik qamtamasyz etý júıesine ótti. Jaqynda bul másele áskerılermen birge qaralǵan bolatyn. Sonymen qatar Parlament depýtattary osy taqyrypty talqylaǵan edi. Qazirgi kezde Memleket basshysynyń tapsyrmasy boıynsha jumys toby quryldy. Úsh aıdyń ishinde Qorǵanys mınıstrliginiń jáne basqa da kúsh qurylymdardyń ókilderimen, sondaı-aq Úkimettiń qarjylyq-ekonomıkalyq blogymen birge tıisti usynysty daıarlaımyz», - dedi T. Dúısenova senatorlar suraǵyna jaýap bere otyryp.
Budan buryn habarlanǵandaı, mınıstr shahterlerdiń zeınetke shyǵý jasyn tómendetýge qatysty pikir bildirdi.
