Qazaqstanda apta ishinde bolǵan kadrlyq taǵaıyndaýlar
2022 jylǵy 3 shilde 13:48

Qazaqstanda apta ishinde bolǵan kadrlyq taǵaıyndaýlar

NUR-SULTAN. QazAqparat – Ótip bara jatqan aptada elimizdiń mınıstrlikterinde jáne jańadan qurylǵan óńirlerinde kadrlyq aýys-túıis boldy. QazAqparat agenttigi 27 maýsym men 3 shilde aralyǵyndaǵy jańa taǵaıyndaýlarǵa sholý usynady.

Apta basynda Almaz Ydyrysov QR ındýstrııa jáne ınfraqurylymdyq damý vıtse-mınıstri laýazymyna taǵaıyndaldy.

Almaz Ydyrysov 1983 jyly Qaraǵandy qalasynda dúnıege kelgen. Qaraǵandy memlekettik tehnıkalyq ýnıversıtetin támamdaǵan. Eńbek jolyn 2003 jyly jol jumysshysy bolyp bastaǵan. 2005-2006 jyldary — «Qazaqavtojol» JShS tehnıkalyq-óndiristik bóliminiń jetekshi mamany. 2006-2014 jyldary — QR Kólik jáne kommýnıkatsııa mınıstrliginiń qurylymynda qyzmet etti. 2014-2016 jyldary — «Qazavtojol» AQ Soltústik Qazaqstan fılıaly dırektorynyń orynbasary. 2016-2019 jyldary QR Investıtsııalar jáne damý mınıstrliginiń qurylymynda basshylyq laýazymdarda boldy. 2019-2022 jyldary — QR Indýstrııa jáne ınfraqurylymdyq damý mınıstrligi Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary – QR bas memlekettik qurylys ınspektorynyń orynbasary. 2022 jyldyń sáýirinen bastap QR IIDM Qurylys jáne turǵyn úı-kommýnaldyq sharýashylyq isteri komıteti tóraǵasy – QR bas memlekettik qurylys ınspektory boldy.

QR Eńbek jáne halyqty áleýmettik qorǵaý mınıstrligi apparatynyń basshysy bolyp Azamat Beıisbekov taǵaıyndaldy.

Azamat Beıisbekov 1985 jyly Qaraǵandy qalasynda dúnıege kelgen. E. Bóketov atyndaǵy Qaraǵandy memlekettik ýnıversıtetin támamdaǵan. Prezıdenttik jastar kadr rezerviniń múshesi. Eńbek jolyn 2009 jyly QR Kedendik baqylaý komıtetiniń kedendik rásimdeý mamanynyń mindetin atqarýshy bolyp bastaǵan. 2009-2011 jyldary — QR Indýstrııa jáne jańa tehnologııalar mınıstrligi Indýstrııalyq-ınnovatsııalyq damýdy salaaralyq úılestirý departamentiniń sarapshysy, bas sarapshysy. 2011-2012 jyldary — QR Premer-Mınıstri Keńsesiniń ındýstrııalyq-ınnovatsııalyq damý bóliminiń bas sarapshysy, bas konsýltanty. 2012-2015 jyldary QR Prezıdenti Ákimshiliginde túrli laýazymdarda qyzmet etti. 2015-2020 jyldary — QR Qaýipsizdik Keńesiniń Áskerı qaýipsizdik jáne qorǵanys bóliminiń konsýltanty; ınspektory; sektor meńgerýshisi. 2020 jylǵy aqpannan bastap QR Qaýipsizdik Keńesiniń Áskerı qaýipsizdik jáne qorǵanys bólimi meńgerýshisiniń orynbasary boldy.

Al Ádilet mınıstriniń buıryǵymen Baqyt Ábishev mınıstrliktiń apparat basshysy laýazymyna taǵaıyndaldy.

Baqyt Ábishev 1965 jyly Ońtústik Qazaqstan oblysynda dúnıege kelgen. S. Kırov atyndaǵy Qazaq memlekettik ýnıversıtetin, RF Prezıdenti janyndaǵy Reseı halyq sharýashyylyǵy jáne memlekettik qyzmet akademııasyn bitirgen. Eńbek jolyn 1983 jyly OQO Saıram aýdandyq sotynyń sot otyrysynyń hatshysy bolyp bastaǵan.

1987-1991 jyldary — Almaty qalasy Alataý aýdandyq Іshki ister bólimi janyndaǵy vedomstvodan tys kúzettiń obektilik kúzet bastyǵy. 1991-1993 jyldary — Almaty oblysy Іle aýdanynyń prokýratýrasynda qyzmet atqardy. 1993-1996 jyldary — OQO prokýratýrasynyń aǵa tergeýshisi; bólim prokýrory. 1996-1997 jyldary — OQO Alǵabas aýdany prokýrorynyń aǵa kómekshisi. 1997 jyly — OQO Memlekettik tergeý komıteti basqarmasynyń qasaqana kisi óltirýdi tergeý bóliminiń bastyǵy. 1997-1999 jyldary — OQO Saıram aýdany prokýrorynyń birinshi orynbasary boldy. 1999-2000 jyldary — Jambyl oblysy prokýratýrasynyń jedel tergeý qyzmeti zańdylyǵyn qadaǵalaý, tergeý jáne anyqtaý basqarmasynda jumys istedi. 2000-2001 jyldary — Taraz qalasy prokýrorynyń m.a. 2001 jyly Jambyl oblysy prokýratýrasynyń tergeý jáne anyqtaý, jedel izdestirý qyzmetiniń zańdylyǵyn qadaǵalaý basqarmasynyń bastyǵy boldy. 2001-2004 jyldary — Jambyl oblysy Rysqulov aýdanynyń prokýrory. 2004-2005 jyldary jeke menshik uıymda jumys istegen. 2005-2007 jyldary — Qaraǵandy oblysy Ádilet departamentiniń bastyǵy. 2007-2009 jyldary — QR Ádilet mınıstrligi Tirkeý qyzmeti jáne quqyqtyq kómek kórsetý komıteti tóraǵasynyń orynbasary, tóraǵasy. 2009 jyly QR Joǵarǵy Soty Tóraǵasynyń keńesshisi qyzmetin atqardy.

2009-2010 jyldary — QR Joǵarǵy Soty Apparatynyń zań bóliminiń meńgerýshisi. 2010-2011 jyldary — QR Joǵarǵy Soty janyndaǵy Sottardyń qyzmetin qamtamasyz etý departamentiniń quqyqtyq qamtamasyz etý bóliminiń meńgerýshisi. 2011-2012 jyldary — QR Baılanys jáne aqparat mınıstrligi Memlekettik qyzmetterdi avtomattandyrýdy baqylaý jáne HQKO qyzmetin úılestirý komıtetiniń tóraǵasy. 2012-2013 jyldary — QR Kólik jáne kommýnıkatsııa mınıstrligi Kóliktik baqylaý komıtetiniń tóraǵasy. 2013-2014 jyldary — QR Ádilet mınıstrligi Tirkeý qyzmeti jáne quqyqtyq kómek kórsetý komıtetiniń tóraǵasy. 2014-2016 jyldary — QR Ádilet mınıstrliginiń «Jyljymaıtyn múlik ortalyǵy» ShJQ RMK bas dırektorynyń m.a., bas dırektory. 2016-2017 jyldary «Azamattarǵa arnalǵan úkimet» MK KEAQ qurylymynda basshylyq laýazymdardy atqardy. 2017 jylǵy naýryzdan bastap QR Bas prokýratýrasynyń Quqyqtyq statıstıka jáne arnaıy esepke alý jónindegi komıteti tóraǵasynyń orynbasary boldy.

Sonymen birge, bul aptada jańadan qurylǵan Jetisý oblysy ákiminiń orynbasarlary taǵaıyndaldy.

Jetisý oblysy ákiminiń orynbasary laýazymyna bekitilgen Jeńis Tuıaqov taǵaıyndaldy, dep habarlaıdy 1967 jyly týǵan. Bilimi joǵary. Almaty memlekettik medıtsına ınstıtýtyn, QR Qarjy akademııasyn, «AlmaU» ýnıversıtetin bitirgen, iskerlik ákimshilik júrgizý doktory. Eńbek jolyn kommertsııalyq qurylymdarda bastady. Ár jyldarda «KEGOC» jáne basqa da ulttyq kompanııalarda basqarýshy dırektor boldy. Qazaqstan Respýblıkasy Energetıka, ındýstrııa jáne saýda mınıstrliginde departament dırektory, Taldyqorǵan qalasynda «TATEK» AQ prezıdenti, Jambyl jáne Pavlodar oblystarynyń energetıka jáne TÚKSh basqarmalarynyń bastyǵy, Qazaqstan Respýblıkasy Premer-Mınıstri Keńsesiniń óńirlik damý bólimi meńgerýshisiniń mindetin atqarýshy laýazymdarynda boldy. 2017 jyldyń shildesinen beri Almaty oblysy ákiminiń orynbasary qyzmetin atqardy.

Jetisý oblysy ákiminiń taǵy bir orynbasary Álibek Jaqanbaev 1964 jyly týǵan. Bilimi joǵary. Qazaqtyń Eńbek Qyzyl Tý ordendi aýyl sharýashylyǵy ınstıtýtyn «orman sharýashylyǵy», Qazaq ulttyq agrarlyq ýnıversıtetin «memlekettik jáne jergilikti basqarý» mamandyqtary boıynsha bitirgen. Eńbek jolyn Alakól aýdanynda «Levoberejnyı» keńsharynyń jumysshysy bolyp bastaǵan. Uzaq jyl Alakól aýdany Úsharal qalasynda orman sharýashylyǵy salasynda eńbek etti. Sarqan, Alakól, Eńbekshiqazaq aýdandarynyń ákimi qyzmetterin atqardy. 2022 jyldyń aqpanynan Almaty oblysy ákiminiń orynbasary boldy.

Sondaı-aq Jetisý oblysy ákiminiń áleýmettik sala boıynsha orynbasary laýazymyna Rýstam Álı taǵaıyndaldy. Rýstam Álı 1984 jyly týǵan. Ál-Farabı atyndaǵy Qazaq ulttyq ýnıversıtetiniń magıstratýrasy men doktorantýrasyn «shyǵystaný», І.Jansúgirov atyndaǵy Jetisý memlekettik ýnıversıtetin «qarjy» mamandyqtary boıynsha bitirgen. PhD doktory. Eńbek jolyn Almaty qalasynda «Delovaıa nedelıa» gazetinde tilshi bolyp bastap, osy gazette bólim redaktory, bas redaktordyń orynbasary boldy. Ár jyldarda Almaty oblystyq ishki saıasat basqarmasynyń «Jetisý jastary» jastar ortalyǵy dırektory, Eskeldi aýdany Qaınarly aýyldyq okrýginiń ákimi, Almaty oblysy jastar saıasaty máseleleri basqarmasynyń bastyǵy, oblystyq ishki saıasat basqarmasynyń bastyǵy, Almaty oblysy ákiminiń orynbasary laýazymdaryn atqardy. 2021 jyldyń mamyrynan Eskeldi aýdanynyń ákimi boldy.

Sonymen qatar Nurjan Eginbaev Jetisý oblysy ákimi apparatynyń basshysy bolyp taǵaıyndaldy. Nurjan Janaıdaruly Eginbaev 1975 jyly týǵan. Bilimi joǵary. Qazaq memlekettik ekonomıkalyq ýnıversıtetin, D.A.Qonaev atyndaǵy gýmanıtarlyq ýnıversıtetti bitirdi, bidliktiligi boıynsha - «ekonomıst», «zańger». Eńbek jolyn «Tirek» JShS-da ekonomıst bolyp bastady. Birshama ýaqyt Іshki ister organdarynda qyzmet etti.

Ulytaý oblysynda Qaırat Shaıjanov Jezqazǵan qalasynyń ákimi qyzmetine taǵaıyndaldy.

Qaırat Abdollauly 44 jasta. Jańaarqa aýdany Atasý kentinde dúnıege kelgen. Eki joǵary bilimi bar, Qaraǵandy memlekettik tehnıkalyq ýnıversıtetin, Qazaq tutynýshylar odaǵy Qaraǵandy ekonomıkalyq ýnıversıtetin támamdaǵan. Eńbek jolyn 2000 jyly bastaǵan. Ár jyldary bıznes salasynda, túrli memlekettik qyzmette eńbek etken. 2009-2013 jyldary Sátbaev qalasy ákiminiń orynbasary, 2015-2018 jyldary Qaraǵandy oblysy Osakarov aýdanynyń ákimi qyzmetin atqarǵan. 2019 jyldan bastap osy kúnge deıin Aýyl sharýashylyǵy mınıstrliginiń «Ulttyq agrarlyq ǵylymı-bilim berý ortalyǵy» KEAQ aktıvterdi basqarý departamenti dırektory laýazymynda eńbek etti.

Abaı oblysy ákiminiń birinshi orynbasary bolyp Aıdyn Kárimov taǵaıyndaldy.

Aıdyn Meırambekuly Kárimov 1988 jylǵy 1 qańtarda dúnıege kelgen. L. Gýmılev atyndaǵy Eýrazııa ulttyq ýnıversıtetin, Qazaq qarjy-ekonomıka akademııasyn, KAZGıÝÝ ýnıversıtetin támamdaǵan. Eńbek jolyn 2006 jyly bastaǵan. Túrli jyldary QR TJM «Esepteý tehnıkasy, telekommýnıkatsııalar, ınformatıka jáne sıtýatsııalyq taldaý» RMK, «AıTı-Servıs» JShS, «Ulttyq aqparattyq tehnologııalar» AQ, «Telekommýnıkatsııalar salasyndaǵy tehnıkalyq súıemeldeý ortalyǵy» RMK, Astana jáne Semeı qalalary ákiminiń apparattarynda qyzmet etken. 2012-2016 jyldary QR Ekonomıkalyq damý jáne saýda mınıstrliginiń (qazirgi QR Saýda jáne ıntegratsııa mınıstrligi) Halyqaralyq ekonomıkalyq ıntegratsııany retteý departamentiniń dırektorynyń orynbasary, basqarma basshysy, bas sarapshysy bolyp jumys istedi. 2016 jyldan bastap QR Premer-Mınıstri Keńsesiniń qurylymynda jumys isteıdi: 2016-2017 jyldary — Syrtqy baılanystar jáne hattama bólimi meńgerýshisiniń orynbasary, 2017-2019 jyldary — Syrtqy baılanystar jáne hattama bóliminiń meńgerýshisi – QR Premer-Mınıstriniń hattama shefi. 2019 jyldyń sáýir-qarasha aılary aralyǵynda QR Premer-Mınıstri Keńsesiniń Syrtqy ekonomıkalyq yntymaqtastyq jáne hattama bóliminiń meńgerýshisi laýazymyn atqardy. 2019 jyldyń qarasha aıynda QR Premer-Mınıstriniń Keńsesi basshysynyń orynbasary bolyp taǵaıyndaldy.

Abaı oblysy ákiminiń apparat basshysy bolyp Jasulan Sársebaev taǵaıyndaldy.

Jasulan Birlikuly Sarsebaev 1986 jyly 22 shildede burynǵy Semeı oblysy Aıagóz qalasynda dúnıege kelgen. Mamandyǵy - zańger. Eńbek jolyn «Qazaqstandaǵy jas zańgerler qaýymdastyǵy» Respýblıkalyq qoǵamdyq birlestigi Semeı qalasy boıynsha fılıalynyń dırektory bolyp bastaǵan. Ár jyldarda Shyǵys Qazaqstan oblysynyń ishki saıasat basqarmasynyń dinı birlestikter jáne saıası partııalarmen jumys boıynsha bólimniń bas mamany, mádenıet basqarmasy basshysynyń orynbasary, jastar saıasaty máseleleri basqarmasynyń basshysy qyzmetterin atqarǵan. 2015-2019 jyldary Shyǵys Qazaqstan oblysynyń týrızm jáne syrtqy baılanystar basqarmasynyń basshysy bolyp qyzmet etti. 2019 jyldyń qańtar-tamyz aılary aralyǵynda ShQO ákimi apparatynyń basshysy boldy. Osy ýaqytqa deıin Shyǵys Qazaqstan oblystyq ishki saıasat basqarmasynyń basshysy laýazymyn atqarǵan.

Sonymen birge, Abaı oblysynda jańadan qurylǵan Aqsýat aýdanynyń ákimi bolyp Ashat Smaılov taǵaıyndaldy.

Ashat Saıdahmetuly Smaılov 1968 jyly 1 naýryzda Semeı oblysy Aqsýat aýdany Qyzyl Kesik aýylynda dúnıege kelgen. 1991 jyly Qaraǵandy memlekettik ýnıversıtetin «ekonomıst» mamandyǵy boıynsha bitirdi. Eńbek jolyn 1994 jyly Aqsýat aýdandyq qarjy bóliminiń kirister túsýin boljaý jáne ekonomıkalyq taldaý bóliminiń aǵa ekonomısi bolyp bastaǵan. Keıin Tarbaǵataı aýdandyq qarjy bólimi meńgerýshisiniń orynbasary, bıýdjet bóliminiń basshysy qyzmetterin atqardy. 2002-2005 jyldar aralyǵynda Tarbaǵataı aýdandyq ekonomıka bólimin, keıin aýdan ákimi apparatynyń qarjy-sharýashylyq bólimin basqarǵan. Eki jyl Tarbaǵataı aýdandyq ekonomıka jáne bıýdjettik josparlaý bóliminiń basshysy laýazymynda qyzmet etti. 2009-2010 jyldary Tarbaǵataı aýdany ákimi apparatynyń basshysy boldy. 2010-2018 jyldary aralyǵynda Tarbaǵataı aýdany ákiminiń orynbasary, 2018-2020 jyldary Kókpekti aýdanynyń ákimi laýazymyn atqardy. Osy ýaqytqa deıin Tarbaǵataı aýdanynyń ákimi bolyp eńbek etti.

Abaı oblysy Kókpekti aýdanynyń ákimi bolyp Dildábek Orazbaev taǵaıyndaldy.

Dildábek Tájibaıuly Orazbaev 1961 jyly 8 mamyrda Ońtústik Qazaqstan oblysy Tólebı aýdany Qasqasý aýylynda dúnıege kelgen. 1988 jyly Qazaqtyń Eńbek Qyzyl Tý ordendi aýyl sharýashylyǵy ınstıtýtyn ǵalym agronom jáne 2009 jyly Almaty ekonomıkalyq ýnıversıtetin qarjyger mamandyqtary boıynsha bitirgen. Eńbek jolyn Ońtústik Qazaqstan oblysy Lenger aýdanynyń Abaı atyndaǵy ujymsharynda mehanızator bolyp bastady. Ár jyldary atalǵan ujymsharda bas ekonomıst, brıgadır, bas agronom, tóraǵa, Ońtústik Qazaqstan oblysy Tólebı aýdany boıynsha salyq bóliminde aǵa salyq ınspektory, «Aǵjan-Maǵjan» JShS dırektory, Ońtústik Qazaqstan oblysy tabıǵı resýrstar jáne tabıǵat paıdalanýdy retteý basqarmasynyń bastyǵy bolyp jumys istedi. 2013-2019 jyldary aralyǵynda Tarbaǵataı aýdanynyń ákimi, 2019-2020 jyldary Aıagóz aýdanynyń ákimi qyzmetin atqardy. Kókpekti aýdanynyń ákimi bolyp taǵaıyndalǵanǵa deıin ShQO Orman sharýashylyǵy jáne janýarlar dúnıesi aýmaqtyq ınspektsııasynyń basshysy bolyp eńbek etti.

Shyǵys Qazaqstan oblysynda jańadan qurylǵan Samar aýdanynyń ákimi bolyp Radjan Seıtqanov taǵaıyndaldy.

Radjan Qaıyrqanuly Seıtqanov Shyǵys Qazaqstan oblysy Katonqaraǵaı aýdany Katonqaraǵaı aýylynda dúnıege kelgen. 2008 jyly Almaty energetıka jáne baılanys ınstıtýtyn ınjener mamandyǵy boıynsha bitirgen. 2015 jyly Almaty ekonomıka jáne statıstıka akademııasyn támamdap, ekonomıka jáne bıznes bakalavry atandy. Eńbek jolyn 2009 jyly «ShQ AEK» AQ jabdyqtardy jóndeý jónindegi elektr slesari bolyp bastaǵan. Rıdder qalasy ákimdiginiń «Infroservıs» MKK bas ınjeneri bolyp jumys istedi. 2012 jyly Semeı qalasyndaǵy «Bastaý-Semeı» JShS bas energetıgi, Glýbokoe aýdanynyń qurylys, sáýlet jáne qala qurylysy bóliminiń mamany bolyp eńbek etken. Glýbokoe aýdany ákimdiginiń «Teploenergııa» MKK dırektorynyń mindetin atqardy. 2014-2015 jyldary Katonqaraǵaı aýdanynyń mádenıet jáne tilderdi damytý bóliminiń ınspektory, jetekshi mamany, basshysy laýazymdarynda boldy. Sonymen qatar Katonqaraǵaı aýdany ishki saıasat, mádenıet jáne tilderdi damytý bólimi basshysynyń orynbasary, Katonqaraǵaı aýdany Katonqaraǵaı aýyldyq okrýgi ákiminiń orynbasary, Glýbokoe aýdany ákiminiń orynbasary qyzmetterin atqarǵan. Osy ýaqytqa deıin Kókpekti aýdanynyń ákimi laýazymynda eńbek etti.

Jambyl oblysynda Jýaly aýdanynyń ákimi bolyp Jalǵas Murtaza taǵaıyndaldy.

Jalǵas Álıjanuly Murtaza 1988 jyly Jambyl oblysy Jýaly aýdanynda týǵan. L.N.Gýmılev atyndaǵy Eýrazııa ulttyq ýnıversıtetin «memlekettik jáne jergilikti basqarý», M.H.Dýlatı atyndaǵy Taraz óńirlik ýnıversıtetin «qurylys materıaldaryn, buıymdaryn jáne konstrýktsııalaryn óndirý» mamandyǵy boıynsha bitirgen. Eńbek jolyn 2010 jyly Qurylys jáne turǵyn úı-kommmýnaldyq sharýashylyq isteri agenttiginde sarapshy bolyp bastaǵan. Ár jyldary Qazaqstan Respýblıkasy Qurylys jáne turǵyn úı-kommmýnaldyq sharýashylyq isteri agenttigi Qarjylyq jumys jáne bıýdjettik josparlaý departamentiniń sarapshysy, bas sarapshysy, Jambyl oblysy ákimi apparatynyń uıymdastyrý-ınspektorlyq bólimindegi oblys ákiminiń bas ınspektory, Jambyl aýdany ákiminiń orynbasary, oblys ákimi apparatynyń óńirlik baqylaý jáne uıymdastyrý-ınspektorlyq jumysy bóliminiń basshysy qyzmetterin atqarǵan. 2021 jyldyń sáýir aıynan bastap Jambyl oblysy ákimdiginiń týrızm basqarmasynyń basshysy laýazymynda eńbek etip keldi.

Sondaı-aq, Jambyl oblysy ákiminiń ókimimen T. Rysqulov aýdanynyń ákimi bolyp Ernar Esirkepov taǵaıyndaldy.

Ernar Serikáliuly Esirkepov 1981 jyly Jambyl oblysy T.Rysqulov aýdanynda týǵan. 2003 jyly Qazaq ulttyq agrarlyq ýnıversıtetin «agroónerkásip kesheni kásiporyndaryndaǵy ekonomıka jáne menedjment» mamandyǵy boıynsha támamdaǵan. Eńbek jolyn 2003 jyly T.Rysqulov aýdany ákimi apparatynyń uıymdastyrý-kadrlyq jáne baqylaý jumysy bóliminiń mamany bolyp bastaǵan. Ár jyldary T.Rysqulov aýdany ákimdiginiń ekonomıka jáne bıýdjettik josparlaý, káspkerlik bólimderiniń bas mamany, Jambyl oblysy ákimi apparatynyń uıymdastyrý-ınspektorlyq jáne kadrlyq jumys bóliminiń bas mamany, bas ınspektory, qujattama jáne baqylaý bóliminiń basshysy, «Nur Otan» partııasy oblystyq fılıalynyń «Qyzmet» bastaýysh partııa uıymynyń tóraǵasy, oblys ákimdiginiń eńbek ınspektsııasy basqarmasy basshysynyń orynbasary-memlekettik eńbek ınspektory qyzmetterin atqarǵan. 2021 jyldyń qyrkúıek aıynan bastap búgingi kúnge deıin Jambyl oblysy ákimdiginiń eńbek ınspektsııasy basqarmasynyń basshysy - bas memlekettik eńbek ınspektory laýazymynda eńbek etip keldi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT