+7 (701) 759 90 19
USD 424.99 EUR 504.21
RUB 5.81 CNY 65.66
Jańalyqtar

Qazaqstanda apta ishinde bolǵan kadrlyq taǵaıyndaýlar

2021 jylǵy 13 maýsym 11:09
Bólisińiz:
Qazaqstanda apta ishinde bolǵan kadrlyq taǵaıyndaýlar

NUR-SULTAN. QazAqparat – Osy aptada elimizdiń Joǵarǵy sotynda, mınıstrlikterde jáne óńirlerde birqatar kadrlyq aýys-túıis boldy. QazAqparat agenttigi 7-13 maýsym aralyǵynda bolǵan kadrlyq taǵaıyndaýlarǵa sholýyn usynady, dep habarlaıdy QazAqparat.

Apta basynda Denıs Shıpp Qazaqstan Respýblıkasy Joǵary Sot Keńesiniń Tóraǵasy laýazymyna taǵaıyndaldy.

Denıs Shıpp 1968 jyly 27 aqpanda Petropavlda dúnıege kelgen. Ol Omby memlekettik ýnıversıtetin «quqyqtaný» mamandyǵynda jáne akademık Korolev atyndaǵy Samara memlekettik aeroǵarysh ýnıversıtetin bitirgen. Ár jyldary ol aǵylshyn tiliniń aýdarmashysy jáne salyq polıtsııasy ınspektory bolyp jumys istedi. Petropavl qalalyq sotynyń jáne Almaty qalasynyń mamandandyrylǵan qarjy sotynyń sýdıasy bolǵan. 2011 jyldan 2015 jylǵa deıin – Almaty qalasynyń mamandandyrylǵan qarjy sotynyń tóraǵasy boldy. 2015 jyly Joǵarǵy Sottyń sýdıasy boldy.

Denıs Shıptiń ornyna QR Parlamenti Májilisiniń Zańnama jáne sot-quqyqtyq reforma komıtetiniń tóraǵasy Qanat Mýsın Joǵarǵy sot sýdıasy bolyp saılandy.

1966 jylǵy 27 aqpanda Tselınograd (Astana) qalasynda dúnıege kelgen. E.A. Býketov atyndaǵy Qaraǵandy memlekettik ýnıversıtetin bitirgen. Zańger. Aǵa ádilet keńesshisi, qarjy polıtsııasynyń polkovnıgi. 1984-1986 jyldary Tselınograd qalasynyń Lenın aýdandyq halyq sotynyń sot oryndaýshysy, sot otyrysynyń hatshysy, arhıvarıýsy. 1986-1989 jyldary «Tselınogradoblgaztop» óndiristik birlestiginiń aǵa ıýrıskonsýlty. 1989-1998 jyldary Tselınograd qalasynyń, Aqmola oblysynyń prokýratýra organdarynda qyzmet etken, Astana qalasy prokýrorynyń orynbasary. 1998-2001 jyldary Soltústik Qazaqstan oblysy prokýrorynyń orynbasary, Jambyl oblysy prokýrorynyń birinshi orynbasary.

2001-2007 jyldary qarjy polıtsııasy organdarynda qyzmet etken, Batys Qazaqstan oblysy, Almaty qalasy Ekonomıkalyq qylmys jáne sybaılas jemqorlyqqa qarsy kúres departamenti basshysynyń orynbasary. 2007-2010 jyldary Qazaqstan Respýblıkasynyń Qaýipsizdik Keńes apparatynda jumys istegen: bas sarapshy, bas ınspektory, Qaýipsizdik Keńesi Hatshylyǵy meńgerýshisiniń orynbasary. 2010-2012 jyldary Soltústik Qazaqstan oblysy prokýrorynyń birinshi orynbasary.

2012-2016 jyldary Astana qalasynyń Ádilet departamentiniń basshysy. 2016 jyldyń naýryzynan bastap altynshy saılanymdaǵy Qazaqstan Respýblıkasy Parlamenti Májilisiniń depýtaty. 2021 jyldyń qańtar aıynan bastap jetinshi saılanymdaǵy Qazaqstan Respýblıkasy Parlamenti Májilisiniń depýtaty-Zańnama jáne sot-quqyqtyq reforma komıtetiniń tóraǵasy bolǵan. «Eren eńbegi úshin», «QR táýelsizdigine 20 jyl», «Astananyń 10 jyldyǵy» medaldarymen, quqyq qorǵaý organdarynyń vedomstvolyq nagradalarymen marapattalǵan.

Vladımır Bojko Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby (KÁAQQ ROSh) Baqylaý keńesi tóraǵasynyń orynbasary bolyp taǵaıyndaldy.

Vladımır Bojko 1971 jyly V.I. Lenın atyndaǵy Qazaq polıtehnıkalyq ınstıtýtyn, 1976 jyly KSRO MQK joǵary kýrstaryn bitirgen. Bilimi boıynsha mamandyǵy «taý-ken jumystaryn elektrlendirý jáne avtomattandyrý». Ol ár jyldary QR Ulttyq qaýipsizdik komıteti júıesinde basshylyq qyzmetterdi atqarǵan. General-leıtenant ataǵy bar. 2007-2014 jyldary Vladımır Bojko Tótenshe jaǵdaılar mınıstrligin basqardy, al 2016 jyly Májilis tóraǵasynyń orynbasary bolyp saılandy. Otan aldyndaǵy erekshe eńbegi úshin І dárejeli «Barys», ІІ dárejeli «Aıbyn» ordenderimen, KSRO, Qazaqstan Respýblıkasy men shet elderdiń 43 medalimen marapattalǵan.

QR Mádenıet jáne sport mınıstrligi Arhıv isteri jáne qujattamany basqarý komıtetiniń tóraǵasy bolyp Qýat Borashev taǵaıyndaldy.

Qýat Qaharmanuly Borashev 1972 jyly Jambyl oblysynda dúnıege kelgen. Ál-Farabı atyndaǵy Qazaq memlekettik ulttyq ýnıversıtetin támamdaǵan. Mamandyǵy boıynsha biliktiligi — jýrnalıst. Eńbek jolyn 1993 jyly «Qazaqstan» memlekettik teleradıo habarlaryn taratý kompanııasynyń redaktory qyzmetinen bastaǵan. 1994 jylǵy mamyr-qazan aılary aralyǵynda «Qazaqstan televızııasy men radıosy» respýblıkalyq korporatsııasynyń reporteri boldy. 1994-1995 jyldary — orta mektep muǵalimi. 1995-1997 jyldary — «Raıhan-TV» telekompanııasynyń dıktory. 1997 jylǵy shilde-qyrkúıek aılary aralyǵynda — «Taraz-TV» qalalyq telearnasynyń redaktory. 1997-2000 jyldary — «Aqnur» jáne «Azan» toptarynyń redaktory, jetekshisi, «Jambyl oblystyq teleradıokompanııasy» JAQ kommentatory.

2000-2003 jyldary — «Qazaqstan temir joly» JAQ bas mamany. 2003-2005 jyldary — «Egemen Qazaqstan» respýblıkalyq gazetiniń tilshisi. 2005 jylǵy aqpan-maýsym aralyǵynda — «QR Prezıdentiniń TRK» UAQ bóliminiń meńgerýshisi. 2005-2006 jyldary — «Qazaqstan Respýblıkasy Prezıdentiniń TRK» UAQ bólim meńgerýshisi. 2006 jylǵy naýryz-tamyz aralyǵynda — QR Prezıdenti Baspasóz qyzmetiniń bas sarapshysy. 2006-2007 jyldary — «Egemen Qazaqstan» respýblıkalyq gazetiniń sholýshysy. 2007-2012 jyldary — QR Prezıdenti Ákimshiliginde túrli qyzmetter atqarǵan. 2012-2013 jyldary — QR Mádenıet jáne aqparat mınıstrliginiń Aqparat jáne muraǵat komıteti tóraǵasynyń orynbasary. 2013-2017 jyldary — QR Memlekettik hatshysy Hatshylyǵy meńgerýshisiniń orynbasary. 2017 jyldyń maýsym-qarasha aralyǵynda — «Egemen Qazaqstan» respýblıkalyq gazetiniń bas redaktory. 2017-2019 jyldary — QR Mádenıet jáne sport mınıstrligi Til saıasaty komıtetiniń tóraǵasy. 2019 jylǵy naýryzdan bastap qazirgi taǵaıyndaýǵa deıin — QR Memlekettik hatshysy hatshylyǵy meńgerýshisiniń orynbasary.

Túrkistan oblysynyń ákimi Ómirzaq Shókeevtiń ókimimen, QR Prezıdenti Ákimshiligi jáne Túrkistan qalasynyń máslıhat depýtattarynyń kelisimimen Túrkistan qalasy ákimi qyzmetine Nurbol Turashbekov taǵaıyndaldy.

Nurbol Ábdisattaruly Turashbekov 1980 jyly Tólebı aýdanynda týǵan. 2000 jyly M.Áýezov atyndaǵy Ońtústik Qazaqstan memlekettik ýnıversıtetin, 2005 jyly M.Dýlatı atyndaǵy Taraz memlekettik ýnıversıtetin bitirgen. Mamandyǵy ınjener-ekonomıst. Eńbek jolyn 2001 jyly Ordabasy aýdanynda jer kadastr bıýrosynan bastaǵan.

2002 jyly Ordabasy aýdandyq jer-kadastrlyq bıýrosynyń meńgerýshisi, 2009 jyly Saıram jer-kadastrlyq bıýrosynyń dırektory, 2010 jyly «Ońtústik Qazaqstan jerge ornalastyrý ǵylymı-óńdiristik ortalyǵy» enshiles memlekettik kásipornynyń dırektory, 2012 jyly (Astana qalasy) «Jerge ornalastyrý ǵylymı-óńdiristik ortalyǵy» respýblıkalyq memlekettik kásiporny bas dırektorynyń birinshi orynbasary qyzmetine taǵaıyndalǵan. 2016 jyldyń sáýir aıynan bastap «Azamattarǵa arnalǵan úkimet» memlekettik korporatsııasynyń «Jer kadastry ǵylymı-óndiristik ortalyǵy» dırektsııasy dırektorynyń orynbasary, «Jer kadastry jáne jyljymaıtyn múlikti tehnıkalyq tekserý» dırektsııasy Memlekettik jer kadastry basqarmasynyń basshysy laýazymyn atqarǵan. Birneshe jaýapty qyzmetterde eńbek etken Nurbol Turashbekov 2017-2020 jyldar aralyǵynda Túlkibas aýdanynyń ákimi, 2020 jyldyń mamyr aıynan Ordabasy aýdanynyń ákimi laýazymyn atqaryp keldi.

Almaty qalasy boıynsha Ekonomıkalyq tergeý departamentiniń basshysy qyzmetine Embergen Qudaıbergenov taǵaıyndaldy.

Embergen Sákenuly Kudaıbergenov 1978 jyly 23 qazanda Almaty oblysynda týǵan. 1997 jyly QR Almatynyń joǵary mektebin, 2003 jyly QR ІІM Akademııasyn, 2016 jyly Qaraǵandy ekonomıkalyq ýnıversıtetin bitirgen. Eńbek jolyn 1997 jyly ishki ister organdarynda bastady. Ár jyldary qarjy polıtsııasynda, QR Іshki ister mınıstrliginiń Qaraǵandy akademııasynda, memlekettik menshikti basqarý organdarynda basshylyq qyzmetterde jumys istedi. 2020 jyldyń aqpanynan bastap osy ýaqytqa deıin Jambyl oblysy boıynsha Ekonomıkalyq tergeý departamentinde basshy boldy.

Almaty qalasy ákiminiń kreatıvti ekonomıka jónindegi shtattaǵy keńesshisi bolyp Ernar Qurmashev taǵaıyndaldy.

Ernar Qurmashev 1984 jyly 18 jeltoqsanda týǵan. Q.Sátbaev atyndaǵy QazUTÝ-di támamdady. «New York Film Academy»-de taǵylymdamadan ótken. «Kazakhstan Computer Graphics» JShS basshysy, «Astana Film Fund» kınokompanııasynyń dırektory, «Almaty Film Festival» halyqaralyq kınofestıvaliniń bas prodıýseri bolyp jumys istedi. Almatynyń Mádenıet basqarmasynyń basshysy, Ulttyq kınony qoldaý memlekettik ortalyǵy basqarma tóraǵasynyń orynbasary qyzmetterin atqarǵan. 2021 jyldyń sáýir aıynan «Qazaqstannyń kreatıvti kásipkerler qaýymdastyǵy» ZTB basqarma tóraǵasy boldy. «Tomırıs», «Anaǵa aparar jol», «Kanıkýly off-line», «Raıony», «Bıznesmender» sııaqty birqatar qazaqstandyq fılmniń prodıýseri retinde jumys jasady.

Sonymen birge, QR Sybaılas jemqorlyqqa qarsy is-qımyl agenttiginiń Almaty qalasy boıynsha departamentiniń basshysy bolyp Murat Ahmetov taǵaıyndaldy.

Murat Jambyluly Ahmetov S.Kırov atyndaǵy Qazaq memlekettik ýnıversıtetin bitirgen, zań ǵylymdarynyń kandıdaty. 1992-2005 jyldary Pavlodar oblysynyń prokýratýra organdarynda ártúrli laýazymdarda jumys istedi. 2005-2007 jyldary QR Bas prokýratýrasynyń departament bastyǵy. 2007 jyldan 2014 jylǵa deıin Nursultan qalasynyń, Qaraǵandy jáne Soltústik Qazaqstan oblystary prokýratýrasynda basshylyq laýazymdardy atqardy. 2014-2019 jyldary Sybaılas jemqorlyqqa qarsy qyzmettiń Ońtústik Qazaqstan oblysy boıynsha basshysy boldy. Qazirgi taǵaıyndaýǵa deıin QR Sybaılas jemqorlyqqa qarsy is-qımyl agenttiginiń 1 departamentiniń basshysy boldy.

Jambyl oblysy Ekonomıkalyq tergeý departamentiniń basshysy qyzmetine Qaırat Bektembaev taǵaıyndaldy.

Qaırat Sálimuly Bektembaev eńbek jolyn 1991 jyly bastap, 25-ten astam jyl boıy qarjy polıtsııasy jáne memlekettik kirister organdarynda qyzmet etti. 2019-2020 jyldary Qaraǵandy oblysy boıynsha ETD-de basqarma basshysy qyzmetin atqarǵan. 2021 jyldyń naýryzynan bastap Túrkistan oblysy boıynsha ETD basshysynyń orynbasary laýazymynda jumys istegen.

Soltústik Qazaqstan oblysy ákiminiń jańa orynbasary bolyp Sátjan Ablalıev taǵaıyndaldy. Ol qurylys, kólik jáne avtomobıl joldary máselelerimen aınalysady.

Sátjan Ablalıev 1970 jyly týǵan. Almaty avtomobıl-jol ınstıtýtyn «ınjener-qurylysshy» mamandyǵy boıynsha jáne Qazaq qatynas joldary ýnıversıtetin «ınjener-ekonomıst» mamandyǵy boıynsha támamdaǵan. Tehnıka ǵylymdarynyń kandıdaty. «Qurmet» ordeniniń, «Eren eńbegi úshin» medaliniń ıegeri. 1987 jyly eńbek jolyn Ońtústik-Embi munaı barlaý ekspedıtsııasynyń ınjener-tehnıkalyq qyzmetiniń operator-kollektor qyzmetinen bastaǵan. Osy taǵaıyndaýǵa deıin Sátjan Áıtenuly QR Indýstrııa jáne ınfraqurylymdy damytý mınıstrliginiń avtomobıl joldary komıteti tóraǵasynyń orynbasary bolyp qyzmet etken.

Jáne apta sońynda QR Ekologııa, geologııa jáne tabıǵı resýrstar mınıstrligi apparat basshysynyń buıryǵymen Nurlybek Ǵaısın Jaıyq-Kaspıı oblysaralyq basseındik balyq sharýashylyǵy ınspektsııasynyń basshysy bolyp taǵaıyndaldy.

Nurlybek Ǵaısın 1971 jyly 2 tamyzda Atyraý oblysynda dúnıege kelgen. Máskeý álemdik ekonomıka jáne qarjy ınstıtýtyn «zańger» mamandyǵymen bitirgen. Balyq sharýashylyǵy salasynda 1995 jyldan beri jumys isteıdi. Eńbek jolyn «Balyqshy» balyq qorǵaý ınspektsııasynyń memlekettik ınspektory laýazymynan bastaǵan. Buǵan deıin QR Ekologııa, geologııa jáne tabıǵı resýrstar mınıstrligi balyq sharýashylyǵy komıtetiniń Jaıyq-Kaspıı oblysaralyq basseındik balyq sharýashylyǵy ınspektsııasy basshysynyń orynbasary qyzmetin atqarǵan.








Bizdiń kanalymyzǵa jazylyńyz:

Bólisińiz:

Avtor:

Aıjan Serikjanqyzy

Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Janıbek Amangeldı
Janıbek Amangeldı
954-059
REDAKTOR
Janat Qapalbaeva
Janat Qapalbaeva
954-059

MURAǴAT