Qazaqstanda 280 aýyl sharýashylyǵy kooperatıvi qurylady
2022 jylǵy 26 mamyr 11:57

Qazaqstanda 280 aýyl sharýashylyǵy kooperatıvi qurylady

NUR-SULTAN. QazAqparat – Elimizde 9 myńnan asa otbasylyq qosalqy sharýashylyqty biriktiretin 280 aýyl sharýashylyǵy kooperatıvi qurylady. Bul týraly Senatta «Halyqtyń tabysyn arttyrýdyń 2025 jylǵa deıingi baǵdarlamasy» keshendi josparyn iske asyrýdy talqylaý kezinde Premer-Mınıstrdiń orynbasary Eraly Toǵjanov málim etti, dep habarlaıdy QazAqparat tilshisi.

«2025 jylǵa deıin halyqtyń taýar satyp alý múmkindigin qorǵaý maqsatynda qanttan basqa azyq-túlik taýarlary boıynsha 100% ımportty almastyrý sharalary iske asyrylady. Bul iri 87 sút-taýar fermasyn, 14 et kombınatyn, 17 qus fabrıkasyn iske qosý jáne 6,6 myń gektar baq pen bir qant zaýytyn (Pavlodar) salý arqyly júzege asyrylady», - dedi E. Toǵjanov.

Sonymen qatar ol baqsha, sút, bal ónimderin óndiretin 9 myńnan asa otbasylyq qosalqy sharýashylyqty biriktiretin 280 aýyl sharýashylyǵy kooperatıvin qurý josparlanyp otyrǵanyn aıtty.

«Jalpy joǵaryda atap ótkenimdeı, 2025 jylǵa deıin 450 myńnan asa jumys oryndaryn qurý josparlanǵan agroónerkásip salasyn damytý «Aýyl amanaty» jobasy aıasynda iske asyrylady. Bul rette otbasylyq sharýashylyqty damytý boıynsha Jambyl oblysynda tıimdi iske asyrylǵan pılotty jobany elimizdiń basqa aımaqtaryna taratý jumystary júrgizilip jatyr. Qanatqaqty joba 2019 jyldan beri 11 aýyldyq okrýgte iske asyryldy. Nátıjesinde, jobaǵa qatysqan 2,5 myń otbasynyń tabysy 4 esege artqan. Bul aýyldardaǵy ataýly áleýmettik kómek alýshylar sany 65%-ǵa azaıǵan. Kásipkerler sany 966-dan 3248-ge deıin ósken, ıaǵnı árbir úshinshi otbasy kásipkerlikpen aınalysyp otyr. Qazir 11 aýyldan túsetin jyl saıynǵy salyq túsimderiniń kólemi 125 mln teńgege jetti», - dedi Úkimet basshysynyń orynbasary.

Budan buryn habarlanǵandaı, E. Toǵjanov «Samuryq-Qazyna» qory kompanııalar tobyndaǵy óndiris jumysshylarynyń jalaqasy kóteriletinin aıtty.

Ekonomıkanyń túrli salalarynda ınvestıtsııalyq jobalardy iske asyrý esebinen 2025 jylǵa deıin 2 mln-nan astam jańa jumys orny qurylady.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT