Qazaqstanda 1700-den astam eldi meken gazben qamtylǵan – Úkimet
2022 jylǵy 24 mamyr 14:18

Qazaqstanda 1700-den astam eldi meken gazben qamtylǵan – Úkimet

NUR-SULTAN. QazAqparat – Qazaqstanda 1700-den astam eldi meken nemese 11 mıllıonnan astam qazaqstandyq tabıǵı gazben qamtamasyz etilgen. Bul týraly QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Álemdik taldaý energııa kózderiniń basqa túrlerin óndirý men tutynýǵa qaraǵanda gaz ónerkásibi ozyq qarqynmen damyp jatqanyn kórsetip otyr. Qazaqstanda da dál osyndaı jaǵdaı. Máselen, 2017 jyly elimiz shamamen 14 mlrd tekshe metr gaz tutynsa, 2021 jyly onyń kólemi 19 mlrd tekshe metrge jaqyndady. Ótken jyldyń ózinde ǵana 3600-den astam ónerkásiptik nysan gazǵa kóshirildi», - dedi Premer-Mınıstr Úkimettiń búgingi otyrysynda.

Osynyń nátıjesinde sońǵy 5 jylda ishki naryqta gaz tutyný kólemi 35%-ke ósken. Al bıyl tutyný kólemi 20 mlrd tekshe metrge deıin artady dep boljanǵan.

«Gazdandyrylǵan eldi mekenderdiń jalpy sany 1700-den asady. Osylaısha 11 mln-nan astam qazaqstandyq tabıǵı gazǵa qol jetkizedi. Bul turaqty ósim kórsetip otyrǵan gaz salasynyń elimizdiń áleýmettik-ekonomıkalyq damýynda mańyzdy oryn alatynyn kórsetedi», - dedi Álıhan Smaıylov.

Buǵan deıin Energetıka mınıstri 2022 jyly halyqtyń 58,43% paıyzy gazben qamtylatynyn aıtqan edi.

Bıyl 133 jobany iske asyrýǵa 96 mlrd teńge qarastyryldy, bul 146 myń adamdy nemese 93 eldi mekendi gazben qamtamasyz etýge múmkindik beredi.


Jańalyqtar

MURAǴAT