Jańalyqtar  >
  Sport

Qazaqstan ústel tennısinen álem chempıonatynda alǵash ret fınalǵa shyqty

2022 jylǵy 9 jeltoqsan, 09:37
Qazaqstan ústel tennısinen álem chempıonatynda alǵash ret fınalǵa shyqty

ASTANA. QazAqparat – Týnıste ústel tennısinen jasóspirimder arasynda ótip jatqan álem chempıonatynda qazaqstandyq Alan Qurmanǵalıev fınalǵa shyqty, dep habarlaıdy QazAqparat tilshisi.

Qazaqstan ústel tennısi federatsııasynan málim etkenindeı, qaraǵandylyq A.Qurmanǵalıev mysyrlyq Hana Godamen birge aralas jupta jartylaı fınalda japonııalyqtar Takýmı Tanımoto – Rın Mendemen kezdesti.

Elmıra Alıeva jattyqtyratyn A.Qurmanǵalıev pen onyń juby H.Goda (bapkeri Ismaıl Hısham) azýly qarsylastaryn 3:2 esebimen tize búktirdi.

Mamandardyń sózine qaraǵanda, qazaqstandyq sportshy jartylaı fınalda ózin jaqsy qyrynan kórsete bildi. Shabýyldap, qatty soqqylar jasap, juptasyn da qoldap otyrdy. Matchtan keıin Hana Godanyń ózi de Alannyń jeńiske jetelegenin atap kórsetti.

Osylaısha, Alan qazaqstandyq sportshylar arasynan ústel tennısinen alǵash ret álem chempıonatynyń fınalyna shyǵyp otyr.

Fınalda Alan men Hana portýgalııalyq Tıago Abıodana – ıspanııalyq Marııa Berzosamen bas júldeni sarapqa salady. Oıyn Astana ýaqytymen 10 jeltoqsanǵa qaraǵan túni saǵat 00.45-te bastalady.

Eske sala keteıik, budan buryn Alan Qurmanǵalıev ústel tennısinen álem chempıonatynyń 4/1 fınalyna shyqqanyn jazǵan bolatynbyz.


Foto: ttfrk.kz
Uqsas jańalyqtar
Tegı:
Sport   Tennıs  
Seriktester jańalyqtary

Jańalyqtar