Qazaqstan Úkimeti jańa Investıtsııalyq saıasat tujyrymdamasyn bekitti
2022 jylǵy 23 maýsym 10:06

Qazaqstan Úkimeti jańa Investıtsııalyq saıasat tujyrymdamasyn bekitti

NUR-SULTAN. QazAqparat – Búgin Úkimet otyrysynda Qazaqstannyń 2026 jylǵa deıingi Investıtsııalyq saıasaty tujyrymdamasy bekitildi, dep habarlaıdy QazAqparat tilshisi.

«Memleket basshysy Qasym-Jomart Kemeluly Toqaevtyń tapsyrmasy boıynsha Investıtsııalyq saıasattyń jańa tujyrymdamasy ázirlendi. Bul qujat el ekonomıkasyna tartylatyn ınvestıtsııalardyń ósýine aıtarlyqtaı yqpal etetin bolady. Jalpy, biz ınvestıtsııalar ósiminiń pandemııaǵa deıingi deńgeıine jettik. Bıylǵy jyldyń 5 aıynda negizgi kapıtalǵa salynǵan ınvestıtsııalar kólemi 2,5 paıyzǵa ósip, 4,1 trln teńgeni qurady», dedi QR Premer-Mınıstri Álıhan Smaıylov.

Úkimet basshysynyń dereginshe, óńirler arasynda bıylǵy jyly Aqmola oblysy, Shymkent jáne Almaty qalalary negizgi kapıtalǵa salynǵan ınvestıtsııalar ósiminiń joǵary qarqynyn kórsetip otyr. Al, Túrkistan jáne Qaraǵandy oblystarynda bul kórsetkish aıtarlyqtaı tómendep ketken.

«2021-shi jyldyń qorytyndysy boıynsha Qazaqstanǵa tartylǵan tikeleı sheteldik ınvestıtsııalardyń jalpy kólemi aldyńǵy jylmen salystyrǵanda 38 paıyzǵa ósip, shamamen 24 mlrd dollardy qurady. Salalar boıynsha tikeleı sheteldik ınvestıtsııalardyń eń kóp ósimi ónerkásipte, saýdada, qarjy jáne saqtandyrý qyzmetinde, kólik pen qurylysta tirkelip otyr», – dedi ol.

Álıhan Smaıylov Qazaqstan tikeleı sheteldik ınvestıtsııalar úshin tartymdy el ekendigin jáne bul jaǵynan Ortalyq Azııa óńirinde kósh bastap turǵanyn basta aıtty.

«Qazirgi jaǵdaıda biz osy pozıtsııany nyqtaı túsip, sheteldik ınvestıtsııalar úshin belsendi qımyldaýymyz kerek jáne ınvestorlarǵa barynsha ońtaıly jaǵdaı jasaýymyz qajet. Sondaı-aq, ekonomıkanyń shıkizattyq emes sektorlarynda ınvestıtsııalyq jobalardy qarjylandyrý kózderin keńeıtý kerek. Búgin usynylyp otyrǵan Investıtsııalyq saıasat tujyrymdamasy ekonomıkany damytýdyń jáne halyqtyń ál-aýqatyn arttyrýdyń draıverine aınalatyn jańa ınvestıtsııalyq tsıkldiń bastaýy bolýy tıis. Tujyrymdamada 2026-shy jyly negizgi kapıtalǵa ınvestıtsııalar deńgeıin Jalpy ishki ónimniń 25,1 paıyzyna deıin jetkizýdi jáne tikeleı sheteldik ınvestıtsııalar kólemin 25,5 mlrd dollarǵa deıin ulǵaıtýdy kózdeıtin aýqymdy maqsatty ındıkatorlar belgilengen. Memlekettik ınvestıtsııalyq saıasat sapaly sheteldik jáne ishki ınvestıtsııalardy tartýǵa, ekonomıkalyq belsendilikti arttyrýǵa jáne halyqtyń tabysyn ulǵaıtýǵa, onyń ishinde jańa turaqty jumys oryndaryn qurýǵa baǵyttalatyn bolady», - degen Premer-Mınıstr tujyrymdamany bekitý úshin daýys berýdi usyndy.

Úkimet músheleri tujyrymdama jobasyn qoldap daýys berdi.


Seriktester jańalyqtary

Jańalyqtar

Úrdis

MURAǴAT